ʼn Kopskuif in krag en wat fisiek moontlik is

Die BMW M8 Competition. (Foto: Verskaf)

Vir petrolkoppe was die lewe nog nooit só opwindend soos nou nie. Bugatti werk tans aan hul Chiron wat 480 km/h sal kan haal. Teen 480 km/h weeg ʼn 16 gram doppie op die bande se lugklep 7,2 kg elk! Dis fantasties.

Nie eers twee dekades gelede nie was bó 400 kW ongehoord. Nou praat ons van ʼn BMW met 460 kW en 750 Nm. Dié krag word opgewek deur ʼn 4.4 liter V8 met twee turbo’s. Dit neem 3.2 sekondes van 0 tot100 km/h en hy sal aanhou draf tot bó 300 km/h. Maar dit is nog lank nie die hele prentjie nie.

Daar is min karre wat deesdae kan versnel soos die BMW M8 Competition. Hy is barbaars in sy aanval op pad na die horison. Die Michelin Pilot Sport 4S-bande waarmee die M8 Competition ry, is vir my opvallend. Toe ek jonger was kon bande nie só klou nie; dit was net onmoontlik. Miskien die bande waarmee hulle in F1 en Groep B-tydrenne in die sneeu gejaag het, maar beslis nie op ʼn gewone produksiemotor nie.

Die BMW M8 Competition. (Foto: Verskaf)

Nog ʼn element van die BMW M8 Competition wat vir my ongeëwenaard is, is sy remme. Die koolstofkeramiekremme op die M8 is verstommend. Dit rem met verskriklike krag en word nie warm soos gewone staalremme nie. Ek het een keer redelik hard gerem van asemrowende snelhede af en dit sou by die meeste ander karre die remskywe vernietig het, maar nie die M8 nie.

Dan kom nog ʼn dimensie by in die M8 se karakter. Die M8 is gemakliker as wat enige voertuig van dié kaliber behoort te wees. Supermotors het altyd een of ander tekortkoming gehad. Óf hulle was ongemaklik, óf hulle het na brandstof gestink, óf die remme was nutteloos, óf daar was nie ʼn kattebak nie, óf die hantering was angswekkend – daar was altyd iets, maar sover ek kan sien het die BMW M8 Competition nie een nie. Wag, ek praat bog. Die agterste sitplekke het geen beenruimte nie; BMW kan dit eerder verwyder en die gewig bespaar.

Die binneruim van die M8 is pragtig aanmekaargesit. Bougehalte beïndruk, soos altyd in ʼn BMW. Die meters se vorm is nie vir my die mooiste op aarde nie – ek dink BMW probeer hul kenmerkende sierrooster daarmee na-aap… iets wat vir my onnodig is.

Teen R3,3 miljoen is die BMW M8 Competition beslis vinnig. Hy is bitter mooi ook. Ek is nie oortuig dat hy oor ʼn paar dekades uitermatig spesiaal sal wees nie, maar dit is ʼn fantastiese ervaring. ʼn Mens begrawe jou voet in die mat en hou vas vir lewe en dood. ʼn Mens kan op die M8 staatmaak om jou te asem weg te slaan met die wete dat die remme en bande alles kan hanteer wat jy van hulle vra.

Die R3,3 miljoen is beslis nie vir almal se sakke nie, maar so ook is ʼn Ferrari nie vir almal beskore nie. As jy die geld het, gaan toetsbestuur een; dis ʼn belewenis.

Die reeks lyk só:

BMW M8 Competition Grand CoupéR3 246 462
BMW M8 Competition CoupéR3 300 272
BMW M8 Competition ConvertibleR3 442 662

Die kompetisie lyk só:

Mercedes-AMG GT63 S 4Matic+ 4-deur Koepee470 kW/900 Nm3.2 sek315 km/h11,3 ℓ/100 km2 jaar/onbeperkte km-waarborg

5 jaar/100 000 km- omvattende instandhoudingsplan

R3 275 800
Porsche Taycan Turbo500 kW/850 Nm3.2 sek260 km/h23 kWh/100 km2 jaar onbeperkte km-waarborg

8 jaar-batterywaarborg

3 jaar/100 000 km- omvattende instandhoudingsplan

R3 426 000
Porsche Panamera turbo S e-Hybrid500 kW/850 Nm3.4 sek310 km/h2,9 ℓ/100 km2 jaar/onbeperkte km-waarborg

6 jaar/120 000 km-batterywaarborg

3 jaar/100 000 km- omvattende instandhoudingsplan

R3 449 000

Tussen dié mededingers is elkeen erg spesiaal om sy eie redes. Ek hou meer van die BMW se binneruim as die Mercedes-AMG s’n. Die Panamera is ekstra spesiaal én het ʼn hibridiese dryfstelsel. Die Taycan Turbo is ʼn pure elektriese voertuig en kan tot by 260 km/h saam met die ander loop. Fantasties!

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

Een kommentaar

Het jy iets op die hart? Maroela Media se kommentaarfunksie is ongelukkig gesluit oor die Paasnaweek. Kom kuier gerus later weer!

Nuuswenke kan deur hierdie vorm gestuur word.