’n Mini vir die hele gesin

Toe ek jonk was, het meeste voertuie nie sitplekgordels agter gehad nie. Indien die agtersitplek ʼn lekker plat bank was kon ʼn mens sommer maklik vier of vyf kinders langs mekaar inpas. As die kindertjies klein genoeg was, het my pa se Mikrobus sommer ʼn 16-sitplekbus geword!

Dinge en tye het egter verander. Ek wil iets oorkom as kinders nie vasgegespe is wanneer hulle in ʼn voertuig is nie. Dan is daar die tweedeurmotor. Ek het drie kinders en kry die piep met ʼn koepee met sy lang deure en geskuif van sitplekke vorentoe en agtertoe om almal in te kry. Ek neem aan dit was Mini se probleem net nadat hulle die handelsmerk uit die dood laat herleef het.

Hulle het egter ʼn goue middeweg gevind. Die Countryman. Eienaars word groot en hul behoeftes verander. Voor kinders is ʼn klein MiniCooper S ʼn fantastiese ding – maar as ʼn mens eers klomp pakkerasies of kinders moet inlaai, dan is hy nie meer voldoende nie.

Die Countryman lyk wel steeds pure Mini. Wanneer ʼn mens die binneruim betree sien jy dit kon net sowel ʼn koepee gewees het, net met vier deure, behoorlike beenruimte agter en ʼn beter kattebak. Die Mini is werklik luuks. Daar is al die veiligheidstelsels wat ʼn mens verwag van ʼn luukse voertuig, soos ses lugsakke, sluitweerremme met remkragverspreiding, vastrap- en stabiliteitsbeheer… die lot.

ʼn Mens raak vinnig gewoond aan luukshede soos CarPlay en Android Auto, aanpasbare spoedkontrole, klimaatbeheer en dies meer. Die Mini balanseer mooi tussen ʼn praktiese gesinsbuks terwyl hy probeer sportief bly en eer gee aan die Cooper S-naamplaatjie. As ʼn mens hard ry op ʼn lekker pad in Mpumalanga maak dit sin, maar as die teer sleg is in die dorp dan kan die rit té hard word. Die harde rit bied egter puik padhouvermoë.

Dit is met die opsomming wat dinge moeilik raak. Die Mini Countryman Cooper S het eintlik altyd ʼn segment amper net vir homself gehad, en nie ʼn ware direkte mededinger nie. Tog steeds nie, maar ek dink daar is ʼn nuweling wat hom moontlik kan onttroon. Dit is Peugeot se 2008. In terme van ontwerp en luukshede troef die Peugeot die Mini, maar as krag jou finale besluit bepaal, dan is die Cooper S die een. Die Peugeot is wel heelwat goedkoper.

Die reeks lyk só:

Die reeks word gedek deur ʼn 2 jaar/ onbeperkte km waarborg en 5 jaar/ 100 000 km omvattende instandhoudingsplan.

Die kompetisie lyk só:

Hier is ʼn magdom mededingers in ʼn wye prysklas. Volkswagen se T-Cross en Peugeot 2008 kan nie teen die prys geïgnoreer word nie. Subaru se XV is die mees bekwame voertuig tussen hulle met sy 220 mm grondvryhoogte en simmetriese vierwielaandrywingstelsel. Die Lexus is bitter duur, maar sy hibridiese dryfstelsel is puik.