Hyundai se i20 is ʼn uiters gewilde motor in Suid-Afrika. Daar is al byna 110 000 i20’s verkoop in Suid-Afrika sedert sy bekendstelling in 2009. Ek was nie gaande oor die eerste weergawe nie – maar die publiek het hom uiters geniet, al was hy aan die einde van die vorige model se leeftyd heel duur teen sy mededingers.
Die nuwe i20 spog met ʼn splinternuwe ontwerp. Tydens ʼn toets het ons die reeksleidende 1.0TGDi Fluid DCT onder hande gehad. Dit is ʼn 1.0 driesilinderturbopetrolenjin met ʼn dubbelkoppelaarratkas. Indrukwekkend. Die voorkant se ontwerp is vir my mooi, en sportief. Die agterkant is waar Hyundai se ontwerpers my verloor.
Die binneruim het ʼn vars ontwerp met hoekige lyne. Die materiale is nie van ʼn uiters luukse gehalte nie, maar die bougehalte voel darem goed. Vir ʼn klein luikrug is daar lekker toerusting en al die luukshede wat ʼn mens deesdae van ʼn nuwe motor verwag. Selfs lugopenings vir agterste passasiers sowel as ʼn selfoonlaaiprop. Voor in die kajuit is leer bekleedsel, klimaatbeheer, Apple CarPlay en Android Auto en dan al die standaarde luukshede soos kragstuur, elektriese vensters en dies meer. Die klein Hyundai spog met draadlose verbintenis tussen jou foon en Apple CarPlay of Android Auto. Dit ís inderdaad lekker, maar die tegnologie kan soms vol fiemies wees – hoewel dit nie uniek aan Hyundai is nie. Die meeste van die draadlose weergawes sukkel soms. Ek verkies steeds om die draad te gebruik.
Die nuwe turboaangejaagde driesilinder bied ʼn indrukwekkende 90 kW en 172 Nm. Dit, gepaard met ʼn sewespoed dubbelkoppelaar ratkas bied ʼn lekker ervaring op die pad. Turboaangejaagde enjins voel werklik lekker sterk hier bó op die platorand, maar ʼn mens moet weet dat indien jy al daai krag die heel tyd gebruik, die voertuig soms swaar kan raak op brandstof. Die i20 tref ʼn lekker middeweg tussen verrigting en verbruik.
Aan die veiligheidskant het die i20 ses lugsakke en sluitweerremme met elektroniese remkragverspreiding sowel as vastrap en stabiliteitsbeheer. Die vering is net soepel genoeg, tog hanteer die i20 soos sy sportiewe voorkoms beloof.
Dit is vir my moeilik om die i20 op te som. Dit is ʼn lekker alternatief in die B-luikrug-segment vir Polo en Fiesta – maar ek is nie oortuig dat ek wel een sou koop nie. Ek sien die sjarme van ʼn unieke voertuig, wat juis nie ʼn Polo is nie – en Hyundai se waarborgverbrandingskoers op i20 is indrukwekkend laag – so die voertuie is betroubaar, en omdat daar nie derduisende op die paaie is nie – word dit ʼn laer diefstal en kapingsrisiko. In daardie geval dink ek sou my keuse swaai na Citroën se C3.
Die reeks lyk só:
Hyundai i20 1.2 Motion handrat | 61 kW/115 Nm | 5,9 ℓ/100 km | R275 900 |
Hyundai i20 1.2 Fluid handrat | 61 kW/115 Nm | 5,9 ℓ/100 km | R289 900 |
Hyundai i20 1.2 Fluid handrat tweekleur | 61 kW/115 Nm | 5,9 ℓ/100 km | R294 900 |
Hyundai i20 1.4 Motion outo | 74 kW/133 Nm | 6,9 ℓ/100 km | R305 900 |
Hyundai i20 1.0 TGDI Fluid handrat | 90 kW/172 Nm | 6,5 ℓ/100 km | R330 900 |
Hyundai i20 1.0 TGDI Fluid handrat tweekleur | 90 kW/172 Nm | 6,5 ℓ/100 km | R335 900 |
Hyundai i20 1.0 TGDI Fluid DCT | 90 kW/172 Nm | 6,9 ℓ/100 km | R355 900 |
Hyundai i20 1.0 TGDI Fluid DCT tweekleur | 90 kW/172 Nm | 6,9 ℓ/100 km | R360 900 |
Die reeks word gedek deur ʼn 7 jaar/ 200 000 km waarborg en 4 jaar/ 60 000 km diensplan sowel at 7 jaar/ 150 000 km padbystand.
Die kompetisie lyk só:
Citroën C3 1.2T Shine | 81 kW/ 205 Nm | 6 ℓ/100 km | 5 jaar/ 100 000 km waarborg
3 jaar/ 60 000 km diensplan |
R352 900 |
Volkwagen Polo Life 1.0TSI 85 kW DSG | 85 kW/ 200 Nm | 5,4 ℓ/100 km | 3 jaar/ 120 000 km waarborg
3 jaar/ 45 000 km diensplan |
R370 700 |
Ford Fiesta 1.0T Titanium outo | 92 kW/ 170 Nm | 5,2 ℓ/100 km | 4 jaar/ 120 000 km waarborg
Diensplan opsioneel |
R382 900 |
Suzuki Swift 1.4T Sport outo | 103 kW/ 230 Nm | 6,1 ℓ/100 km | 5 jaar/ 200 000 km waarborg
4 jaar/ 60 000 km diensplan |
R382 900 |
Peugeot 208 1.2T Allure outo | 96 kW/ 230 Nm | 6,3 ℓ/100 km | 5 jaar/ 100 000 km waarborg
3 jaar/ 60 000 km diensplan |
R396 900 |
Dié voertuie is almal bitter sterk mededingers. Ek persoonlik vrek oor die Citroën C3, én dis ʼn winskoop teen daardie prys met ʼn lae diefstal- en kapingsrisiko. Die splinternuwe Peugeot 208 self is ʼn pragtige voertuig. Die Suzuki Swift Sport bied die beste verrigting, en ʼn bitter sterk waarborg – teen ʼn billike prys.
Hulle gaan nog 100kW moet bysit voor ek my Subaru gaan inruil, maar ek hou rerig baie van die kajuit.
Nog maar lelik!