Nog ʼn segment waar dit voel asof daar weekliks nuwe mededingers bekendgestel word, is die B-sportnutssegment. Dink aan klein luikrûe wat effens opgepomp is. Nie heeltemal ʼn sportnuts nie, maar effens hoër en dalk ietwat groter as hul luikrug kleinboeties.
Ek is gek oor Citroën se C3. Ek het self al drie besit. Dit is ʼn gemaklike luikrug, met lekker spasie, ʼn billike kattebak en ʼn enjin wat voel asof hy op skoon lug loop eerder as brandstof. Myne was almal diesel, en die nuwe petrolweergawes is nie heeltemal so lig soos myne was nie, maar nietemin.
Nou het ons Citroën se C3 Aircross. ʼn Klein sportnutsvoertuig, of só sê hulle. Ek dink nie dat die Aircross enigsins meer spasie bied as die doodgewone C3 nie – dalk behalwe kopruimte, maar steeds vyf sitplekke, en dieselfde voetspoor op die pad.
Die binneruim is eenvoudig, dog luuks toegerus. Daar is klimaat- en spoedbeheer, ʼn raakskerminligtingstelsel wat Apple CarPlay en Android Auto bied. Twee pluimpies vir Citroën is die puik ritgehalte en die sitplekke. Lekker breë, plat sitvlakke met oorgenoeg spasie vir dié van ons sonder ʼn supermodelmiddeltjie.
Onder die kap is ʼn 1.2 driesilinderturbopetrolenjin. Hy stoot 81 kW en 205 Nm deur ʼn sesspoed outomatiese ratkas. Versnelling is heel in die kol vir dié soort voertuig, maar dis op die oop pad waar hy verbasend gemaklik is. Citroën sê dat hy 6,5 ℓ/100 km kan haal om die gekombineerde siklus. Ons het hom effens swaarder ervaar met 7,2 ℓ/100 km.
Die C3 Aircross spog met ses lugsakke, sluitweerremme met elektroniese remkragverspreiding, vastrap en stabiliteitsbeheer – die lot. Dít, gepaard met die lekker vering en sitplekke, sit mens met ʼn lekker tjor. Ek is net nie oortuig dat ek hom sou vat bó die gewone C3 wat R70 000 goedkoper is nie.
Die reeks lyk só:
Citroën C3 Aircross 1.2T Feel | 81 kW/205 Nm | 6,5 ℓ/100 km | R401 900 |
Citroën C3 Aircross 1.2T Shine | 81 kW/205 Nm | 6,5 ℓ/100 km | R424 900 |
Die reeks word gedek deur ʼn 5 jaar/ 100 000 km waarborg en 3 jaar/ 60 000 km diensplan.
Die kompetisie lyk só:
Suzuki Vitara Brezza 1.5 GLX outo | 77 kW/ 138 Nm | 6,2 ℓ/100 km | 5 jaar/200 000 km waarborg 4 jaar/60 000 km diensplan | R313 900 |
Mahindra XUV300 1.2T W8 | 81 kW/ 200 Nm | 6,1 ℓ/100 km | 5 jaar/150 000 km waarborg 5 jaar/90 000 km diensplan | R316 999 |
Kia Sonet 1.5 EX outo | 85 kW/ 144 Nm | 7,2 ℓ/100 km | 5 jaar/onbeperkte km waarborg 4 jaar/60 000 km diensplan | R331 995 |
Chery Tiggo 4 Pro 1.5T Elite SE | 108 kW/ 210 Nm | 6,8 ℓ/100 km | 5 jaar/150 000 km voertuigwaarborg 1 000 000 km enjinwaarborg vir eerste eienaar 5 jaar/60 000 km diensplan | R364 900 |
Renault Duster 1.5dCi Intens | 80 kW/ 250 Nm | 4,8 ℓ/100 km | 5 jaar/150 000 km waarborg 3 jaar/45 000 km diensplan | R389 900 |
Opel Crossland 1.2T Edition | 81 kW/ 205 Nm | 6,2 ℓ / 100 km | 3 jaar/120 000 km waarborg 3 jaar/60 000 km diensplan | R407 900 |
Ford EcoSport 1.0T Titanium outo | 92 kW/ 170 Nm | 6,3 ℓ/100 km | 4 jaar/120 000 km waarborg Diensplan opsioneel | R408 700 |
Hyundai Venue 1.0T Glide | 88 kW/ 172 Nm | 6,9 ℓ/100 km | 5 jaar/150 000 km voertuigwaarborg 7 jaar/200 000 km dryfstelselwaarborg 3 jaar/45 000 km diensplan | R415 500 |
Peugeot 2008 1.2T Allure | 96 kW/ 230 Nm | 6,5 ℓ/100 km | 5 jaar/100 000 km waarborg 3 jaar/60 000 km diensplan | R458 900 |
Volkswagen T-Cross 1.0TSI 85kW Highline | 85 kW/ 200 Nm | 5,3 ℓ/100 km | 3 jaar/120 000 km waarborg 3 jaar/45 000 km diensplan | R448 200 |
Mazda CX-3 2.0 Hikari | 115 kW/ 206 Nm | 6,7 ℓ/100 km | 3 jaar/onbeperkte km waarborg en diensplan | R509 300 |
Die drie goedkoopste kompeteerders maak ʼn sterk saak vir hulself uit. Die Vitara Brezza is ʼn puik opsie teen die prys. Teen R390 000 is die Duster ook ʼn puik opsie. Die enigste een wat geheel en al uit die bus uit val is die Mazda bó R500 000. Almal is puik opsies, gaan toetsbestuur soveel jy kan – een gaan met jou hart praat.