ŉ Vuurwa op stelte…

Die BMW X4M. Foto: Verskaf

Die motorwêreld is besig om op sy kop te draai. Dis waarskynlik al die wringkrag wat ŉ mens deesdae in al die turboaangejaagde motors kry. Nie net is enjins nou beter as ooit tevore nie – maar bande kan geensins vergelyk word met die kruislaagbande van destyds nie.

Ons het onlangs ŉ BMW X4M getoets. Die X4M los my met ietwat van ŉ penarie. Ek is gaande oor ŉ BMW M-kar. Dit was nog altyd die toonbeeld van verrigting vir my. Maar nou is daar ŉ X3, X4, X5 en X6 … almal vol vet M-karre.

Nou, my penarie. Sê ek dan dat ŉ X M nie ŉ ware M is nie? Glad nie. Wat die X’e kan doen is uiters indrukwekkend. Daar is ŉ foto van ŉ X5M wat by Zwartkops in die hande van Gennaro Bonafede, ŉ Suid-Afrikaanse renjaer en instrukteur by BMW se bestuurskool, só kan loop dat sy regtervoorwiel van die grond af klim.

Die BMW X4M. Foto: Verskaf

Die X4 is nie my gunsteling-ontwerp nie, ek verkies ŉ X3 sonder die stomp boude en beter kopruimte vir my drie kinders. Verder – die ontwerp van die X4 is pragtig vir dié wat van daai styl hou. Die Bee Em spog met fantastiese bougehalte, soos ŉ mens verwag van die Duitse vervaardiger.

Verrigting kom van ŉ turboaangejaagde 3.0 inlynsessilinderpetrolenjin. 375 kW en 600 Nm is waarmee dié X4M oorlog toe gaan. BMW beweer 0 – 100 km/h in 4,1 sekondes, maar ek dink dis effe optimisties. Die opset met die X4M se lanseerbeheer hou die omwentelinge net-net té laag om ŉ vurige lansering te kry. Ek is oortuig dit sal 100% wees by seevlak.

Die BMW X4M. Foto: Verskaf

Die X4M bied goeie dele van twee wêrelde. ŉ Mens kry ŉ vurige sportmotor, én beter grondvryhoogte – seker om oor spoedhobbels te jaag…? Ek persoonlik sal nie met dié M grondpaaie en só aandurf nie. Ritgehalte op teer is heel soepel met aanpasbare vering – en as ŉ mens soos ŉ nar begin jaag is daar amper geen bakrol om van te praat nie.

Die X4M is ŉ bekwame supersportnuts. Ek persoonlik sal eerder twee ander BMW’s koop vir amper dieselfde bedrag. Die X4M kos R1,75 miljoen. ŉ X3 30d én ŉ M2 Competition is net meer as R2m … dís wat ek sou koop…

Die reeks lyk só:

BMW M2 Competition	302 kW/ 550 Nm	4.4 sek	250 km/h (beperk)	9.8 ℓ/ 100 km	R1 091 164
BMW M4	317 kW/ 550 Nm	4.1 sek	250 km/h (beperk)	8.3 ℓ/ 100 km	R1 474 362
BMW X3M Competition	375 kW/ 600 Nm	4.1 sek	285 km/h	10.6 ℓ/ 100 km	R1 641 162
BMW X4M Competition	375 kW/ 600 Nm	4.1 sek	285 km/h	10.6 ℓ/ 100 km	R1 744 762
BMW M5	460 kW/ 750 Nm	3.3 sek	305 km/h	10.6 ℓ/ 100 km	R2 119 286
BMW X5M Competition	460 kW/ 750 Nm	3.8 sek	290 km/h	12.5 ℓ/ 100 km	R2 632 258
BMW X6M Competition	460 kW/ 750 Nm	3.8 sek	290 km/h	12.5 ℓ/ 100 km	R2 733 420
BMW M8 Competition	460 kW/ 750 Nm	3.2 sek	309 km/h	10.4 ℓ/ 100 km	R3 300 272

Die reeks word gedek deur ŉ 2 jaar/ onbeperkte km waarborg en 5 jaar/ 100 000 km omvattende instandhoudingsplan.

Die X4M se kompetisie lyk só:

Alfa Romeo Stelvio Quadrifoglio Q4	375 kW/ 600 Nm	3.8 sek 283 km/h	9.8 ℓ/ 100 km	3 jaar/ 100 000 km waarborg 6 jaar/ 100 000 km omvattende instandhoudingsplan	R1 679 485
Jaguar F-Pace SVR	405 kW/ 680 Nm	4.3 sek 283 km/h	11.9 ℓ/ 100 km	5 jaar/ 100 000 km waarborg en omvattende instandhoudingsplan	R1 655 726
Porsche Macan Turbo	324 kW/ 550 Nm	4.3 sek 270 km/h	9.8 ℓ/ 100 km	2 jaar/ onbeperkte km waarborg 3 jaar/ 100 000 km omvattende instandhoudingsplan	R1 699 000
Mercedes-AMG GLC63 S coupé 4Matic+	375 kW/ 700 Nm	3.8 sek 280 km/h	12.3 ℓ/ 100 km	2 jaar/ onbeperkte km waarborg 5 jaar/ 100 000 km omvattende instandhoudingsplan	R2 062 480

Die mededingers is almal bitter spesiaal. Indien jy bevoorreg genoeg is om in dié klas te speel, toetsbestuur almal en kies die een wat vir jou die stoutste is.