Ford het iewers tydens die deurmekaar inperking sy meer bekostigbare bakkie, die XL, opgeknap met mooi sierwiele en ʼn paar tierlantyntjies. Ford het ʼn truuk in die mou … sy naam is Gideo Basson en hy beplan gewoonlik hul avonture en reistogte as dit kom by voertuie aan die media bekend stel. Gideo is ʼn man met ʼn asemrowende kennis van Suid-Afrika, ons paaie en plekke – en hy’t dié keer geensins teleurgestel nie.
Ons het op dag een Hoedspruit toe gevlieg. Dit was die eerste keer dat ek soontoe vlieg. Ek is seker daar is ʼn goeie aantal lesers wat Hoedspruit goed sal ken van hul weermagdae af. Dit is nou nogal vreemd om daar te land, mens taxi vir ʼn ewigheid van die lang aanloopbaan só al verby die loodse wat mooi onder groenigheid weggesteek lê.
Ná ʼn vinnige ete wag ʼn vloot Ford Ranger XL Sports vir ons. Die Ranger XL Sport is ʼn doodgewone XL onder die vel. Dit sluit in ʼn 2.2-TDCI-viersilinderturbodiesel, 118 kW en 385 Nm gepaard met ʼn 6-spoed-wringkragomsitter- outomatiese ratkas en vierwielaandrywing met laestrek en ʼn ewenaarslot.
Die bakkie spog met Ford se SYNC 3-inligtingstelsel met CarPlay en Android Auto, twee lugsakke – ABS, EBD en vastrapbeheer. Ford se klimaatbeheer hou dinge koel in die kajuit, en die sitplekke is met ʼn lekker duursame lap oorgetrek.
Op die pad is dit vinnig duidelik dat die Ranger ʼn lekker reismaat gaan wees. Ek en Justin Jacobs van Avontuur Afrika is vol kattekwaad van die eerste kilometer af. Ons ry in die Blyderivierkloof in. Dit is regtig asemrowend mooi dié tyd van die jaar. Dit is grasgroen. Die drie rondawels lyk heeltemal anders van hier onder by die dam … dis asemrowend mooi. Ons sien ʼn paar seekoeie in die water dobber, krokodille – de lot.
Dag twee begin in die Blyderivier-omgewing – maar vandag is daar vir ons ʼn reuse-ervaring. Ons gaan oor ʼn bergreeks ry – op grond, met die Orrie Baragwanath-pas. Die toneel wat op ʼn mens daarbo wag, is asemrowend. Ek het dit al gereeld gevra. Mense, klim in jul bakkies … ry daai roete, vat daai grondpad – dit is regtigwaar die moeite werd.
Ons eindig die aand in Marble Hall. Die teerpaaie tussen Hoedspruit en Marble Hall is plek-plek amper slegter as die grondpaaie. Die Ranger knip nie ʼn oog nie.
Die Ranger het hom voorwaar fantasties gedra. Ons het 9.1 ℓ/100 km gehandhaaf oor die 800 km.
Die Ranger bly uiters gemaklik, en bied ʼn puik balans tussen ʼn dubbelkajuitbakkie en ʼn leefstylgesinsmotor waarmee sulke ontdekkingsreise voltooi kan word.
Die Sport-pakket voeg R16 500 by die prys van ʼn gewone Ranger XL. Die lyk só:
| Ford Ranger 2.2 TDCi Hi-Rider XL enkelkajuit | R396 700 |
| Ford Ranger 2.2 TDCi Hi-Rider XL outo enkelkajuit | R412 200 |
| Ford Ranger 2.2 TDCi Hi-Rider XL superkajuit | R418 600 |
| Ford Ranger 2.2 TDCi Hi-Rider XL outo superkajuit | R432 100 |
| Ford Ranger 2.2 TDCi Hi-Rider XL dubbelkajuit | R449 400 |
| Ford Ranger 2.2 TDCi Hi-Rider XL 4×4-enkelkajuit | R458 000 |
| Ford Ranger 2.2 TDCi Hi-Rider XL 4×4-superkajuit | R471 000 |
| Ford Ranger 2.2 TDCi Hi-Rider XL outo dubbelkajuit | R471 900 |
| Ford Ranger 2.2 TDCi Hi-Rider XL 4×4-dubbelkajuit | R500 800 |
| Ford Ranger 2.2 TDCi Hi-Rider XL 4×4- outo dubbelkajuit | R522 300 |
Die reeks word gedek deur ʼn 4 jaar/120 000 km-waarborg en 6 jaar/90 000 km-diensplan.
