Motors word met elke nuwe weergawe groter, beter, swaarder, luukser, ensovoorts. Ek dink terug aan my dae as laaitie, ʼn E30 BMW 3-reeks was luuks. As ʼn mens nou in een ry, is dit net beknop. ʼn Ford Escort was ʼn aanvaarbare gesinsmotor … Hoe het ons almal ingepas?
In ʼn see van reusedubbelkajuitbakkies is dit verfrissend om ʼn kompakte BMW teen te kom, met sy hoofdoel om dit lekker te maak om te bestuur … dis al. Die BMW onder oë is die 2-reeks. ʼn 220d om spesifiek te wees. Dié nuwe 2-reeks laat my dink aan die ou E30 3-reeks, maar hy bied baie meer ruimte as die ou BMW’tjie.
Die 20d staan vir ʼn 2.0-viersilinderturbodieselenjin met 140 kW en 400 Nm. Daai krag gepaard met BMW se 8-spoed-sport-outoratkas is lieflik. Let wel, 0–100 km/h neem net 7 sekondes en die 220d sal aanhou hol tot 230 km/h. Nie net is hy rats nie, maar as mens mooi ry, kan mens 4 ℓ/100 km handhaaf. Dit wil gedoen wees.
Die ontwerp is vir my netjies. Klein en kompak, met net twee deure en skoon lyne. Mooi en eenvoudig. Al waarvan ek nie gehou het op ons toetseenheid nie, is die swart wiele waarmee hy hier opgedaag het. Mens kan gelukkig jou eie kleurkombinasie kies as jy jou eie 2-reeks koop.
Die binneruim is lekker luuks. Voorste passasiers het meer as genoeg plek, die sitplekmeganisme werk puik as jy passasiers agter inpak en skuif maklik terug na waar hy gestel was. Jy sou nie reuse agter kon vervoer nie – maar dis nie waarvoor jy ʼn 2-reeks koop nie.
Die 220d is tóg ʼn BMW. Die sitplekke kan oneindig gestel word tot jy perfek gemaklik is. Die stuurwiel kan lekker ver uittrek nader aan jou en op en af. So, ongeag jou grootte of bou – jy sal gemaklik kan wees in die 2-reeks.
Die klankstelsel beïndruk en die inligtingskerm se uitleg is intuïtief. Ek is reeds gewoond aan BMW se iDrive en dit werk maklik. Al waarna ek verlang, is ʼn volumeknoppie vir die klankstelsel langs die handrem; talle vervaardigers begin dit nou doen, en dit werk regtig lekker.
Die 2-reeks het óf 17″- óf 18″-wiele, en BMW het weer die vering fantasties gekalibreer, want die ritgehalte is geensins ondeund nie. Padhouvermoë is baie goed en die agterwielaangedrewe onderstel is opwindend as mens hard begin ry.
Die 2-reeks is maklik om op te som. Daar is verskeie enjins beskikbaar, net wat jou smaak pas. Die 220d bied my ʼn fantastiese kompromis tussen verrigting en brandstofverbruik. Die 220d sal ʼn puik genoot wees vir elke dag lekker ry. Die M240i is ʼn winskoop vir die verrigting wat hy bied.
Die reeks lyk só:
Model | Krag | Brandstof-verbruik | 0–100 km/h | Topspoed | Prys |
BMW 220i Coupé Steptronic | 135 kW/270 Nm | 5.5 ℓ/100 km | 7.2 sek | 230 km/h | R512 700 |
BMW 220d Coupé Steptronic | 140 kW/400 Nm | 4.0 ℓ/100 km | 7 sek | 230 km/h | R550 800 |
BMW 230i Coupé Steptronic | 185 kW/250 Nm | 5.7 ℓ/100 km | 5.6 sek | 250 km/h | R556 500 |
BMW M240i Coupé Sport Auto | 250 kW/500 Nm | 7.1 ℓ/100 km | 4.6 sek | 250 km/h | R693 800 |
Die reeks word gedek deur BMW se 2 jaar/onbeperkte km-waarborg en 5 jaar/100 000 km- omvattende instandhoudingsplan.
Die kompetisie lyk só:
Model | Krag | Brandstof- verbruik | 0–100 km/h | Topspoed | Waarborg | Prys |
Audi A3 sedan 2.0TFSI outo | 140 kW/ 320 Nm | 5.6 ℓ/ 100 km | 6.8 sek | 250 km/h | 1 jaar/onbeperkte km-waarborg 5 jaar/100 000 km- omvattende instandhoudingsplan | R485 500 |
Mercedes-Benz CLA220d AMG Line | 130 kW/ 350 Nm | 4.2 ℓ/ 100 km | 7.7sek | 232 km/h | 2 jaar/onbeperkte km-waarborg 6 jaar/100 000 km- omvattende instandhoudingsplan | R589 732 |
In dié klas is slegs die BMW agterwielaangedrewe, en ʼn tweedeurvoertuig, dus is die ander nie werklik mededingers nie. Ek hou van die BMW se karakter en dus bly dit my keuse.