Porsche hou ’n sessilinderfees

Porsche Cayman GT4 (Foto: Verskaf)

Dit is geen geheim dat ek ŉ Porsche-liefhebber is nie. Ek was nou al bevoorreg om die 718 Boxter en Cayman te ry, ŉ 911 GTS, ŉ 911 Carrera S, Macan, Macan Turbo, Cayenne, Cayenne S, Cayenne Turbo en Cayenne S Coupé. O, en ŉ Panamera S, Panamera Turbo en Panamera S Sport Turismo. Sjoe, dis amper almal…

Ek het ongelukkig nog nie ŉ GT Porsche gery nie. Maar ek glo ons sal binnekort ŉ beurt kry in een van my gunstelinge, die Cayman GT4. Wat dié spesifieke kar so spesiaal maak, is die terugkeer van die plat- of eerder bokser-sessilinderenjin na die Cayman. Ek het om Kyalami gejaag met ŉ 718 Cayman GTS wat die bokser-viersilinderenjin en ŉ fantastiese PDK-ratkas gehad het, maar die kenners het gesê, “al wat kort is die sessilinderklankbaan”.

Porsche Cayman GTS binneruim (Foto: Verskaf)

Hier het ek met die viersilinder-GTS om Kyalami agter ŉ Porsche Experience bestuursinstrukteur gejaag: https://youtu.be/vJ5IJpv3DnM

Gelukkig is dit nie net die GT4 wat die sessilinder kry nie; die GTS kry hom ook.

Die reeks gaan nou só lyk:

Porsche 718 Cayman	220 kW/380 Nm	5.1 sek	275 km/h	7,4 ℓ/100 km	R957 000
Porsche 718 Boxster	220 kW/380 Nm	5.1 sek	275 km/h	7,4 ℓ/100 km	R968 000
Porsche 718 Cayman S	257 kW/420 Nm	4.6 sek	285 km/h	8,1 ℓ/100 km	R1 169 000
Porsche 718 Boxster S	257 kW/420 Nm	4.6 sek	285 km/h	8,1 ℓ/100 km	R1 180 000
Porsche 718 Cayman GTS 4.0	294 kW/420 Nm	4.5 sek	293 km/h	10,8 ℓ/100 km	R1 164 000
Porsche 718 Boxster GTS 4.0	294 kW/420 Nm	4.5 sek	293 km/h	10,8 ℓ/100 km	R1 175 000
Porsche Cayman GT4	309 kW/420 Nm	4.4 sek	304 km/h	10,9 ℓ/100 km	R1 468 000
Porsche 718 Spyder	309 kW/420 Nm	4.4 sek	301 km/h	10,9 ℓ/100 km	R1 393 000

Ons behoort teen die middel van die jaar iewers ŉ beurt met ŉ GT4 te kry. Dit sal ook die eerste GT Porsche en eerste handrat-Porsche wees waarmee ek ry. Ek kan nie wag nie.