Hyundai se i20 is ʼn gewilde buksie onder Suid-Afrikaners.
Ek kon egter nog nooit vatplek aan die i20 kry nie, so ek het vir ons redakteur, Nico Strydom, gevra hy moet sy mening ook gee – net om seker te maak ons gee vir julle ʼn gebalanseerde indruk.
Die ontwerp van die nuutste i20 is rewolusionêr. Daar is allerhande hoeke en lyne wat die ontwerp beslis uniek maak. Dit is nie vir my die mooiste buksie nie – daai toekenning gee ek vir Peugeot se 208, maar Nico dink die sportiewe ontwerp is mooi.
Die binneruim se materiale en gehalte is ook nie op die Peugeot of Polo se standaard nie, maar dit beteken nie dat die spesifikasievlak afsteek nie. Die leerstuurwiel, sportsitplekke, metaalpedale en rooi aksente het vir Nico beïndruk – veral die draadlose Apple CarPlay en Android Auto – met die laaimatjie.
Onder die kap sit Hyundai se 1.0-driesilinderturbopetrolenjin. Hy bied 90 kW en 172 Nm. Dit sal die i20 van 0-100 km/h in 9,9 sekondes haas, 1,1 sekondes stadiger as Peugeot se 208, maar 1,4 sekondes vinniger as die Polo.
Die Polo en 208 is egter onderskeidelik 11 km/h en 13 km/h vinniger as die i20. Ek en Nico stem ook saam dat die Volkswagen ʼn baie beter ervaring bied. Hy is eenvoudig beter gekalibreer, en sy ratkas werk lekkerder met sy enjin.
Op die pad toer die i20 heel goed. Sy ritgehalte is in die kol, maar daar is heelwat windgeraas binne die kajuit. Die i20 se padhouvermoë is heeltemal goed vir wat enige koper sal benodig.
Dit maak dit bitter moeilik om die i20 N Line op te som. Dit is ʼn goeie tjor, en Hyundai as handelsmerk is uiters betroubaar, maar ongelukkig het Hyundai homself hier bietjie uit die mark uit geprys. Die Polo is al jare lank ʼn gunsteling in Suid-Afrika én hy is R30 000 goedkoper. Die Peugeot 208 kos maar R3 000 minder, maar bied heelwat meer krag. Ek én Nico sal graag die Polo koop, maar hy is baie gewild onder die boewe – so dalk is die minder gewilde i20 ʼn veiliger opsie? Gaan toetsbestuur beslis eers almal.
Die reeks lyk só:
| Hyundai i20 1.2 Motion handrat | 61 kW/115 Nm | 5,9 ℓ/100 km | R285 900 |
| Hyundai i20 1.2 Fluid handrat | 61 kW/115 Nm | 5,9 ℓ/100 km | R300 500 |
| Hyundai i20 1.4 Motion outo | 74 kW/133 Nm | 6,9 ℓ/100 km | R316 500 |
| Hyundai i20 1.0T Fluid handrat | 90 kW/172 Nm | 6,5 ℓ/100 km | R342 500 |
| Hyundai i20 1.0T Fluid DCT | 90 kW/172 Nm | 6,9 ℓ/100 km | R367 900 |
| Hyundai i20 1.0T N Line | 90 kW/172 Nm | 6,9 ℓ/100 km | R405 900
|
Die kompetisie lyk so:
| Citroën C3 1.2T Shine | 81 kW/205 Nm | 6 ℓ/100 km | 5 jaar/100 000 km-waarborg 3 jaar/60 000 km-diensplan | R369 900 |
| Volkswagen Polo 1.0TSI 85kW Life | 85 kW/200 Nm | 5,4 ℓ/100 km | 3 jaar/120 000 km-waarborg 3 jaar/45 000 km-diensplan | R374 400 |
| Peugeot 208 1.2T Allure auto | 96 kW/230 Nm | 6,3 ℓ/100 km | 5 jaar/100 000 km-waarborg 3 jaar/60 000 km-diensplan | R402 900 |
| Nissan Micra 84kW turbo Tekna | 84 kW/180 Nm | 5 ℓ/100 km | 6 jaar/150 000 km-waarborg 3 jaar/90 000 km-diensplan | R404 900 |
| Opel Corsa 1.2T 96kW Elegance | 96 kW/230 Nm | 6,3 ℓ/100 km | 3 jaar/120 000 km-waarborg 3 jaar/45 000 km-diensplan | R409 900 |
Elkeen van dié mededingers is bitter sterk. Gaan toetsbestuur almal – een sal jou hart roer. Vir my is dit die Citroën, Polo of 208 – en vir Nico is dit vir seker die Polo.
In hierdie prysklas sal die Swift Sport amok maak. Japanese bougehalte teen n baie medeingende prys en natuurlik die pret faktor.