Volkswagen se Caddy is nie vir ons Suid-Afrikaners vreemd nie. Ek praat nou nie van die Citi Golf-gebaseerde bakkie nie, maar van die klein bussie. Die Caddy het uiters gewild geraak onder kleinsakeondernemings en vervoermaatskappye aan die handelsvoertuigkant, en by groot gesinne met die passasierweergawes.
Hierdie is nou die vyfde generasie van die buksie. Daar is sedert 1979 meer as drie miljoen Caddys wêreldwyd gebou. Die nuutste generasie se name verander effe. Daar is die Caddy, Caddy Maxi, Caddy Kombi, Caddy Maxi Kombi, Caddy Cargo en Caddy Maxi Cargo.
Daar is twee enjins beskikbaar – ʼn 1.6‑viersilinderpetrolenjin met 81 kW en 152 Nm en ʼn 2.0‑turbodiesel, ook met 81 kW, maar ʼn indrukwekkende 300 Nm. Die diesel bied fantastiese brandstofverbruik – in die omgewing van 5,5 ℓ/100 km. Albei enjins maak gebruik van slegs een ratkas – ʼn 6-spoed‑handrat.
Die Cargo-weergawe se deure is slim aangepas en kan groter oopmaak. Die Caddy Maxi Cargo kan nou twee Euro-palette pas. Die passasierweergawes werk fantasties te danke aan die skuifdeure aan albei kante van die voertuig.
Dit is op die pad agter die stuur waar die Caddy eers beïndruk. Dit is dalk ʼn voertuig wat op ʼn handelsvoertuig geskoei is, maar dit ry lieflik, nes ʼn spiksplinternuwe Polo se ouboet. Die Caddy spog met ʼn sterk veiligheidspesifikasievlak wat ses lugsakke insluit, sowel as sluitweerremme met elektroniese remkragverspreiding. Te danke aan die Caddy se lang asafstand, ry hy voorwaar gemaklik. Die 16”‑wiele met ʼn lekker 60‑profiel‑band bied ʼn uiters goeie ritgehalte.
Ek sal die Caddy só opsom: Dit is ʼn lieflike voertuig om te ry, bied puik gehalte en meer as genoeg spasie vir ʼn groot gesin. Die enigste struikelblok wat ek voorsien, is die skrikwekkende prys vir passasierweergawes.
Ons sal weer tyd met die Caddy deurbring en hom dán met sy mededingers vergelyk.
Die reeks lyk só:
Caddy:
Volkswagen Caddy 1.6i | 81 kW/152 Nm | 7,3 ℓ/100 km | R484 200 |
Volkswagen Caddy 2.0TDI | 81 kW/300 Nm | 5,5 ℓ/100 km | R573 800 |
Volkswagen Caddy Maxi 2.0TDI | 81 kW/300 Nm | 5,5 ℓ/100 km | R600 400 |
Caddy Kombi:
Volkswagen Caddy Kombi 1.6i | 81 kW/152 Nm | 7,3 ℓ/100km | R412 100 |
Volkswagen Caddy Kombi 2.0TDI | 81 kW/300 Nm | 5,5 ℓ/100 km | R476 100 |
Volkswagen Caddy Maxi Kombi 2.0TDI | 81 kW/300 Nm | 5,5 ℓ/100 km | R502 700 |
Caddy Cargo:
Volkswagen Caddy Cargo 1.6i | 81 kW/152 Nm | 7,2 ℓ/100 km | R404 000 |
Volkswagen Caddy Cargo 2.0TDI | 81 kW/300 Nm | 5,5 ℓ/100 km | R460 600 |
Volkswagen Caddy Maxi Cargo 2.0 TDI | 81 kW/300 Nm | 5,5 ℓ/100 km | R487 200 |
Die passasierweergawes kom met ʼn 3 jaar/120 000 km‑waarborg en 3 jaar/60 000 km‑diensplan. Kommersiële weergawes geniet ʼn 2 jaar/onbeperkte km‑waarborg.
Ons sal weer tyd met die Caddy deurbring en sien hoe hy hom in die daaglikse roetine gedra. Ons sal hom dan teen sy mededingers opweeg.