Welkom terug, Audi

Die Audi R8. (Foto: Verskaf)

Verskeie faktore het sake vir Audi die afgelope paar jaar ietwat omgekrap. Nét toe Audi dink hy kan Dieselgate agter hom plaas, tref Covid-19. Sjoe.

In wêreldwye terme is Audi Suid-Afrika dalk ʼn klein rolspeler, maar hy is tóg ʼn rolspeler.

Ek het nog altyd gesê in die sportsegment is daar BMW M-liefhebbers, diegene wat AMG’s verkies – en dan Audi RS-mense. Ek het goeie nuus vir laasgenoemde. Audi het pas 15 opgeknapte voertuie gewys en almal sal teen 1 April in vertoonlokale beskikbaar wees.

Kom ons begin by die goedkoopste, die Audi TT RS-koepee en -afslaandak.

Dit word steeds deur Audi se fantastiese vyfsilinderturbopetrolenjin aangedryf. Dit bied 294 kW en 480 Nm. Let wel, 0–100 km/h duik op in ʼn ratse 3,7 sekondes vir die koepee (R1 062 000) en 3,9 sekondes vir die afslaandakmodel (R1 113 500).

Die Audi TT RS-koepee. (Foto: Verskaf)

Daarop volg ʼn splinternuwe buksie: Audi se RS Q3 vuurpyl-sportnuts. Dié word ook deur die vyfsilinderenjin van die TT RS aangedryf en bied steeds 294 kW en 480 Nm. Daar is twee bakstyle beskikbaar: gewoon (R1 094 000) en Sportback (R1 128 000).

Albei neem 4,5 sekondes van stilstand tot 100 km/h.

Een van my gunstelinge is die fantastiese RS4 Avant. Dit is ʼn uber-stasiewa met ʼn 2.9-V6-turbopetrolenjin wat 331 kW en 600 Nm bied. O ja, 0–100 km/h neem ʼn blitsige 4,1 sekondes. Die RS4 Avant is beskikbaar teen R1 296 000 – ʼn ware winskoop teen die M3 en C63S.

Die Audi RS4 Avant. (Foto: Verskaf)

Daar is twee RS5’e beskikbaar: koepee (R1 394 500) en Sportback (R1 409 500). Die RS5 deel die RS4 se V6-enjin met 331 kW en 600 Nm; 3,9 sekondes is al wat dit neem om van stilstand tot 100 km/h te snel.

Nog een van my gunstelinge is die fantastiese Audi SQ7. Dit is ʼn reuse-sewesitplek- Audi Q7 met ʼn briljante V6-turbodieselenjin wat 310 kW en ʼn fantasmagoriese 900 Nm bied. In die tenk neem stilstand tot 100 km/h ʼn ratse 4,8 sekondes en die SQ7 is joune vir R1 679 500.

Die Audi SQ7. (Foto: Verskaf)

Audi se SQ8 is ʼn groot sportnutsvoertuig met ʼn koepeepak aan. Hy geniet dieselfde enjin as die SQ7 en snel ook tot 100 km/h in 4,8 sekondes. Dié voertuig kos R1 848 500.

Die Audi SQ8. (Foto: Verskaf)

Die Audi RS6 is moontlik een van die vinnigste stasiewaens ter wêreld. ʼn Dubbelturbo-V8 bied 441 kW en 800 Nm; 0–100 km/h neem ʼn piepklein 3,6 sekondes en die RS6 is joune vir R2 070 000. Sy koepeepak-boetie is die RS7. Hy het dieselfde enjin en neem óók 3,6 sekondes om 100 km/h te haal.

Dié ene kos R2 173 500.

In sportnutsstyl is die RS Q8 ook deur die V8 aangedryf. Hy neem 3,8 sekondes tot 100 km/h en is die vinnigste sportnutsvoertuig op aarde om die Nürburgring. Hy kos R2 354 500.

Die Audi RS Q8. (Foto: Verskaf)

ʼn Pragtige luukse sedanmotor is Audi se S8. Hy geniet ook ʼn V8-turbo-enjin en bied 420 kW en 800 Nm; 0–100 km/h neem 3,8 sekondes en hy kos R2 484 000. Dis ʼn pragtige langafstand-sedanmotor waarin ʼn mens waarskynlik rondgery word.

Heel boaan die Audi-troon is die R8.

Daar is ʼn koepee (R3 336 000) en ʼn afslaandakmodel (R3 592 500). Die R8 word aangedryf deur ʼn asemrowende 5.0- atmosferiese V10-enjin wat 449 kW en 560 Nm bied; 0–100 km/h neem 3,2 sekondes in die koepee en 3,3 sekondes in die afslaandakmodel.