’n Oorlewingsgids vir vakansies met tieners

Betrek jou tiener reg van die begin af by die beplanning van jou volgende gesinsvakansie. (Foto: Verskaf deur Big Ambitions.)

Dit is heerlik om gesinsvakansie te hou as kinders klein is, dink maar aan die luilekker dae op die strand met emmertjies, roomys en die plaaslike kinderklub wat vermaak verskaf.

Reg, ons weet dit is nie altyd só idillies nie – veral as die kleintjies siek word of hulle roetine heeltemal by die venster uitvlieg, maar dit lyk of gesinsvakansies ŉ ander soort uitdaging bied as kinders eers hulle tienerjare betree.

Hier is ŉ paar wenke om ŉ blaaskans op die beste manier saam met ŉ trop tieners te geniet. Ons hou die idees plaaslik om Covid-19-verwante redes, maar dit bly goeie wenke of jy net jou eie provinsie verken of na die buiteland reis:

1. Betrek jou tiener reg van die begin af

Tieners ly aan ŉ permanente vorm van fomo (fear of missing out). Hulle kan nie die gedagte deurstaan dat hulle ŉ partytjie of die pret saam met vriende gaan mis terwyl hulle nou saam met hul ouers moet uithang nie.

Moenie dit egter nie te persoonlik opneem nie en verwag maar ŉ bietjie weerstand teen die jongste gesinsvakansie veral noudat die nasionale staat van afsondering verder gelig is en hulle weer saam met hulle vriende kan kuier.

Die beste manier om die aanvanklike murmureringe van verdeeldheid te oorkom is om jou tieners van die begin af by die beplanning te betrek.

Sloertoere is heerlik om te beplan. Laat jou tieners help om die verskillende roetes uit te soek, plekke om aan te doen te oorweeg en selfs ŉ sê in die eindbestemming te hê.

Bespreek eerder billike grense met jou tiener en besluit saam oor ŉ plan vir die gebruik van toestelle soos slimfone in die vakansie. (Foto: Verskaf deur Big Ambitions.)

2. Vind ŉ balans en stel grense

Die laaste ding wat jy as ouer wil hê, is dat jou tieners die hele reis op hulle slimfone vasgeplak sit – dit gaan dan tog oor gesinsbande bou, of hoe? Ons moet almal ontspan, maar as tieners die heeltyd op hulle slimtoestelle is gaan jou stresvlakke moontlik net weer begin styg.

ŉ Verbod op die toestelle is ongelukkig ook nie die antwoord nie. Bespreek eerder billike grense met jou tiener en besluit saam oor ŉ plan vir die gebruik daarvan. Jy kan byvoorbeeld instem dat die toestelle in die motor gebruik word, asook ŉ uur in die oggend en aand elke dag tydens die vakansie. Buite die afgesproke tye is dit tyd vir die gesin om saam te kuier, te lees en te verken.

Dit is ook belangrik om almal wat saam reis in ag te neem. Jonger kinders wil dalk graag ŉ voëlpark of akwarium besoek, terwyl tieners miskien eerder ŉ rolprent wil kyk of in die winkelsentrum wil uithang. Oorweeg dit om die dae so te verdeel dat daar tyd gemaak word om in die behoeftes van elke kind gefokus word.

3. Laat waai met avontuur

Natuurlik hang hierdie voorstel heeltemal af van die belangstellings en persoonlikheid van jou tiener af, maar die meeste jong mense hou van ŉ bietjie adrenalien.

Neem hulle om te ry op die langste rodelbaan (toboggan run) in Afrika. (Foto: Verskaf deur Big Ambitions.)

Hier is paar idees:

Neem hulle om te ry op die langste rodelbaan (toboggan run) in Afrika, ŉ 1,7 kilometer lange baan deur Mpumalanga se Long Tom-pas.
Loop in Graskop se glashysbak vir ŉ afdraande tog van 51 meter in die Graskop-kloof af en as jy dapper genoeg is, kan jy ook sommer ŉ brugswaai doen.
Neem die ziplyn deur die pragtige Piekenierskloof-bergoord net buite Citrusdal en laat jou adrenalien behoorlik pomp.
Ry met ŉ kano op die waterweë en riviermonding van die iSimangaliso-vleilandpark in St. Lucia, KwaZulu-Natal en wees sommer bedag op die seekoeie en krokodille.
Gaan verken Jonkershoek met ŉ bromponie van Scootours in Stellenbosch.
Durf die rivierwaters van die Asrivier buite Clarens in ŉ roeiboot aan.

Of jy nou gaan hengel by die Jozini Tiger Lodge of in klein Switserland in die Drakensberge gaan stap, kinders sal die plesier en avontuur geniet, terwyl dit boonop vir ŉ onvergeetlike gesinsvakansie sal sorg,” sê Sharmila Ragunanan, bemarkingsbestuurder van Dream Hotels & Resorts.

Bou genoeg avontuur in jou volgende gesinsvakansie in om die tieners tevrede te hou. (Foto: @nullplus/Unsplash.)

4. Gee hulle ruimte en onafhanklikheid

As dit tyd is om uit te span is die Fancourt-landgoed in George moeilikheid om te klop. Kry ŉ paar fietse by die ontspanningsentrum, of trek jou stapstewels aan vir ŉ wandelings langs die staproetes of ontspan by die swembad. Fancourt se sitkamer vir tieners met internettoegang is die plek waar jonger gaste hulle skoene kan uitskop en nuwe vriende tydens hulle vakansie kan maak.

Peter Dros, direkteur van verkope en bemarking by Fancourt, glo ruimte en vryheid is twee belangrike bestanddele as dit by ŉ lekker vakansie vir tieners kom.

Sy wenke om met tieners te reis is:

Kies ŉ bestemming waar hulle veilig voel en kan verken of net rondhang. Tieners wil hulle vlerke sprei om ŉ vakansie geniet maar jy as ouer wil steeds hê hulle moet veilig wees.
Soek aktiwiteit wat die generasiegaping binne ŉ gesin of familie kan oorbrug. Die Tuinroete het beslis genoeg om almal gelukkig te hou, insluitend bootvaarte en wildritte.
Bring tyd deur in die buitelug.
Gee tieners vryheid en ruimte.
Bou genoeg avontuur in jou vakansie in.

Sorg dat die onafhanklikheid van jou kinders (alle ouderdomme ingesluit) ook sommer sover strek as tot by die pak van hulle eie tasse, die motor in- en uitpak en die versorging van waardevolle items. Hulle kan ook sommer verantwoordelikheid help neem vir die spaar van ŉ bietjie vakansiegeld.

5. ŉ Goeie internetkonneksie sal help

Kinders hou daarvan om verbind te bly en om die waarheid te sê, is jou as ouer se beste opsie om óf heeltemal van die netwerk af te klim óf om ŉ vakansiebestemming te kry met sterk, gratis en verkieslik onbeperkte WiFi vir verskeie toestelle te vind. Daar is niks meer frustrerend as om te hoor hoe die kinders die hele dag kla oor ŉ swak internetverbinding nie.

6. Hou die magies vol, en laat hulle slaap

Daar is geen twyfel hieroor nie, tieners is buierig en temperamenteel. Asem diep in en onthou dit is nie regtig hulle skuld nie – blameer dit maar op hulle hormone. Die ergste buie kan gelukkig met goeie kos, versnapering en baie slaap bestuur word.

Miskien is jou tieners nou naguile – die Covid-19-inperking het dalk ook hulle interne liggaamsklok versteur – maar die meeste jong mense verkies om na middernag te gaan slaap, en eers na middagete op te staan. Die beste is raad is om die sonsopkoms-uitstappies vir ŉ ander tyd te los – beplan eerder die beste avonture vir later in die dag, verkieslik na ŉ massiewe laatontbyt.

’n Oorlewingsgids vir vakansies met tieners