ʼn Badkamer is ʼn plek wat ons wil hê skoon en lig moet voel. ʼn Plek waar ʼn mens kan ontspan en elke oggend vars kan aanpak. Maar om ʼn badkamer oor te doen kos ook dikwels baie geld, wat dit buite die kwessie maak.
The Home Collective is ʼn webtuiste wat jou inspirasie gee oor dekor en hoe om ruimtes in jou huis op die knap. Hier is van hul beste wenke om jou badkamer mooi te maak sonder om jou sak te ruk.
Verf
ʼn Mens het nie die altyd die finansies om ʼn groot badkameropknapping aan te pak nie, so ʼn koste-effektiewe manier om dieselfde effek te kry, is om ou badkamerteëls te verf met Super Grip – ʼn spesiale verf vir teëls. Die verf is maklik verkrygbaar by hardewarewinkels. Kies ʼn mooi kleur of ’n neutrale wit, en voilà.
Verf jou badkamerteëls vir ‘n goedkoper opkikker-opsies (Foto: The Home Collective)
Spieëltjie, spieëltjie
Kies ’n mooi spieël as aksent om die vertrek te anker. Dit gee ook dadelik ’n vars en modieuse gevoel. Die nuwe neiging is ronde metaalspieëls of boogvormige spieëls, wat veral ʼn donkerder badkamer kan laat lyk of daar ʼn venster in is.
Ronde metaalspieëls is hoogmode (Foto: The Home Collective)
Trek die oog
ʼn Lang rak bokant ’n bad is ’n slim manier om ’n fokuspunt te maak – stileer dit met ’n plant, mooi kuns, badprodukte of kerse.
Trek die oog met ʼn rak in jou badkamer (Foto: The Home Collective)
Blindings
Sagter blindings wat uit lap gemaak word, soos Romeinse blindings, help om dadelik die koue teëls van ’n badkamer te versag en die vertrek ’n warmer gevoel te gee.
Sagter blindings skep ‘n warm gevoel in jou badkamer (Foto: The Home Collective)
Netjies en nuttig
Gebruik ’n skinkbordjie of ’n pragtige keramiekbord om jou skoonheidsprodukte langs die wasbak uit te stal en so ook netjies te hou. Sit ’n glasie of koppie by met grimeerkwaste in en ’n vaas met blommetjies. Nou lyk die wasbakrand mooi, maar bly steeds funksioneel.
Hou jou badkamer-bykomstighede netjies maar steeds mooi (Foto: The Home Collective)
Hake
Kies mooi hake vir die badkamermuur; dit gee dit ’n meer modieuse gevoel as die gewone handdoekreling. Kies hout- of koperhake en hang ’n mooi linne kamerjas of sagte handdoeke daaraan.
Mooi hake gee jou badkamer ‘n modieuse gevoel (Foto: The Home Collective)
Besoek gerus The Home Collective se Instagram-blad vir meer dekorwenke.
