‘Madiba is nie siek nie’

Die presidensie sê oud-president Nelson Mandela is nie in die hospitaal nie en rus tans by sy huis in Qunu in die Oos-Kaap.

Die aankondiging kom te midde van gerugte dat Mandela siek is. Die gerugte het glo begin nadat ENews tydens ʼn oorsig van die jaar se nuusgebeure gewys het hoe Mandela vroeër vanjaar na ʼn Johannesburgse hospitaal vervoer word. “Die presidensie het navrae van die media ontvang rakende Madiba se gesondheid,” het die presidensiële woordvoerder, Mac Maharaj, gesê. “Dit wil voorkom of ʼn nuusoorsig deur ʼn mediahuis gelei het tot gerugte van swak gesondheid.” Maharaj sê president Jacob Zuma het Madiba namens die regering en die hele Suid-Afrika ʼn gelukkige en suksesvolle 2012 toegewens.