‘n Verkeersbeampte is ná ‘n noodlottige ongeluk naby Hermanus in die Overberg vir dronkbestuur in hegtenis geneem.
Twee mense is dood en twee ander, insluitend ‘n kind, is Sondagoggend in die ongeluk op die R43 beseer. Owerhede sê hulle was in een voertuig, en die beskuldigde, wat in die stadium nie aan diens was nie, het die ander voertuig bestuur, berig EWN. Kenny Africa, provinsiale hoof van die verkeersdepartement, sê die beampte is in sy aanhouding. “Hy word van bestuur onder die invloed van alkohol en strafbare manslag aangekla,” het Africa gesê. ‘n Hoëprofiel-polisiebeampte van Kaapstad is verlede naweek in hegtenis geneem in verband met dronkbestuur nadat hy met sy voertuig in ‘n ander in Khayelitsha vasgejaag het.