Die polisie in New York is op soek na ‘n dief wat met ‘n sleepwa vol Kersfeesbome weggejaag het.
John Helfer, woordvoerder vir die Sheriff se kantoor in Monroe County, het gesê die rooftog het tussen Dinsdagaand omstreeks middernag en 06:30 Woensdagoggend in Hamlin, naby Lake Ontario, plaasgevind. ‘n Boer het die polisie ontbied toe sy bakkie met ‘n 8m-sleepwa uit sy oprit gesteel is. Daar was 350 Douglas-dennebome in die sleepwa ter waarde van sowat $12 000 (bykans R100 000). Die polisie is tans op soek na die grys en swart bakkie met die woorde “Niagara Landscaping” wat op die agterflapdeur geverf is.