Die sanger Adam Tas, oftewel Francois van der Merwe, en sy vrou, Caren, sê hulle is onkant gevang toe hulle vroeër meegedeel is dat hul ongebore baba ʼn seldsame sindroom het.
Die paartjie, wat in Pretoria bly, leef met die vrees dat hul ongebore babatjie, wat reeds Klara-Belle genoem word, dalk kan sterf, berig Nuus24.
Daar is tekens dat hul eersteling met trisomie 13, of Patau-sindroom, gebore kan word. Trisomie 13, is ’n chromosoomafwyking wat by een uit elke 10 000 babas voorkom, sê dr. Helga de Muelenaere, ’n ginekoloog. Dit behels dat ’n baba ’n ekstra chromosoom het, maar daar is verskeie grade van die toestand. Dit kan moontlik tot verskeie mediese probleme soos ’n hartkwaal of breinskade lei. Sy kan selfs by geboorte sterf of net ’n paar dae leef.