Afdankings – Absa ontken slegte behandeling

Absa het Donderdagaand op aantygings gereageer ná hulle deur die vakbond Solidariteit oor beweerde e-pos afdankings aangevat is en het gesê hulle “bestuur” die uittrede van sommige van hul IT-werkers. Hulle het ook ontken dat hulle met massa afleggings besig is.

Die vakbond het gister laat weet sommige werknemers van Absa is die afgelope week per e-pos in kennis gestel dat hulle op 9 Junie afgedank gaan word. Dit kom glo ten spyte van Absa se volgehoue ontkenning dat hulle tans afleggings uitvoer. Minstens 140 werknemers in die IT-afdeling gaan hulle werk verloor. Die vakbond het bewyse dat die afleggings wyer as net die IT-afdeling strek, maar Absa swyg steeds oor hoeveel mense op 9 Junie afgedank gaan word.

Verskeie werknemers het glo op 7 Mei 2012 om 15:20 ’n brief per e-pos ontvang waarin hulle meegedeel is dat pogings om ander poste vir hulle te kry, onsuksesvol was. Op 8 Mei moes hulle, ter wille van onbelemmerde uitdienstreding, vorms invul waarmee hulle uit hul mediese- en pensioenfondse moes bedank asook ’n vorm waarmee hulle uit die maatskappy bedank.

Business Live berig Absa het laat weet hulle het die betrokke werknemers in die IT-afdeling die nodige ondersteuning oor die afgelope drie maande gebied en het protokol gevolg om die impak van die situasie te verlig.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae