Agt vas vir renosterstropery

Agt mense is in Mpumalanga in hegtenis geneem vir beweerde renosterstropery.

Paul Daphne, woordvoerder van SANParke, sê vyf vermeende stropers is Woensdag onderweg na die Timbavati wildreservaat in hegtenis geneem. Hy sê ʼn jaggeweer, ammunisie en ander toerusting vir stropery is in hul besit gevind. Nog drie vermeende renosterstropers is Woensdag in Giyani in hegtenis geneem na ʼn gesamentlike operasie deur SANParke en die polisie. Die polisie het op ʼn jaggeweer en ammunisie beslag gelê. Die agt vermeende stropers sal binnekort in die hof verskyn.