Die Aktivis van Femen. FotoL REUTERS/Pawel Kopczynski
Verrigtinge om die opening van Barbie se lewensgrootte pophuis in Berlyn, Duitsland, te vier, was van korte duur nadat aktiviste Donderdag buite dié huis betoog het.
ʼn Vrou, wat vermoedelik ʼn lid is van die groep Femen, het met ʼn kaal bolyf op die reuse fontein, wat in die vorm van ‘n hakskoen is, voor die hoofingang geklim en ‘n gekruisigde Barbie-pop aan die brand gesteek en rondgeswaai. Die groep voer aan die gebou is seksistiese propaganda. Betogers het gesê die reuse pophuis en “plastiese Barbie-afgode” bevorder ‘n “ongesonde obsessie met skoonheid” by kinders.
Maroela Media het Donderdag berig dat die deure na Barbie se pienk pophuis geopen is. Die huis is sowat 1 400 vierkante meter. Gaste kan Barbie se droomhuis beleef van haar kombuis tot haar sitkamer. Besoekers kan selfs in haar klerekas rondkrap en van haar klere aanpas. Die huis sal tot 25 Augustus in Berlyn wees voordat dit die res van Europa sal toer.
