Ark se replika van 135 meter voltooi

Foto: Imageglobe

In die hawe van Dordrecht lê ‘n houtboot van 135 meter lank, 30 meter breed en 23 meter hoog – ‘n replika van Noag se ark.

Die man wat die ark gebou het, is die Nederlander Jan Huibers. Trouens, dit is die tweede ark wat hy aanmekaar geslaan het, maar die vorige was ‘n skaalmodel van 70 meter lank. Die boot kan 3 000 mense inneem, maar die owerhede van Dordrecht, sê Huibers, het nie veel ervaring van arke nie, en daarom mag hy nou net 500 mense op ‘n slag aan boord neem.

Hy hoop om jaarliks 300 000 besoekers per jaar aan boord te neem om dan tussen regte en plastiese diere rond te stap om ‘n idee te kry hoe Noag en sy mede-vaarders dit moes beleef het. Huibers vertel die banke was heel bereid om te help met die finansiering, maar sy vrou was minder gelukkig en het die bouery uit sy kop probeer praat.

Altesaam 12 000 bome se hout is gebruik. Hoewel die buitekant baie eg lyk, is die binnekant met staalrame versterk, en is verskeie vertrekke met tegnologie van die 21ste eeu uitgerus, onder andere die restaurant, ‘n ouditorium en twee amfiteaters vir opvoerings. Die plan is dat die ark twee jaar in Dordrecht sal vertoef, en daarna by ander hawens sal aandoen.

 

Herman Toerien

Meer oor die skrywer: Herman Toerien

Herman Toerien is ‘n veelsydige vryskutskrywer van Bloemfontein. Hy het ‘n Honneurs in Politieke Wetenskap, en kwalifikasies in Politieke Wetenskap, Staatsreg, Arbeidsreg en Ekonomie. Artikels en rubrieke uit sy pen het al in meer as 20 publikasies verskyn.

Deel van: Hoofnuus, Nuus, SA-nuus

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

roelof rossouw ·

Ek wonder hoe Jan Huibers die bakteriee voorstel wat ook op die Ark moes wees.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.