ASA-raad ontbind

Die raad van Atletiek Suid-Afrika (ASA) is Saterdag tydens ʼn jaarlikse algemene vergadering in Johannesburg ontbind.

ʼn Interim-raad van sewe lede is intussen aangestel om ASA vir die volgende ses maande te bestuur waarna nog ʼn vergadering gehou sal word en ʼn verkiesing gehou sal word. Die interim-raad is Tebogo Masehla, Harold Adams, Aleck Skhosana, Jakes Jacobs, Daan du Toit, Steven Khanyile en Sello Mokoena. Mokoena, wat namens die raad praat, sê hulle is ʼn mandaat gegee om sake by die beleërde federasie uit te sorteer. Mokoena sê die proses om die raad te ontbind het Vrydag tydens ʼn spesiale vergadering in Johannesburg begin. Hy sê die besluit om die raad te ontbind was eenparig. James Evans, president van ASA, en Hendrick Ramaala, adjunkpresident, was nie by die vergadering teenwoordig nie.