Die polisie is steeds op soek na ʼn Pakistani-egpaar wat Dinsdag ʼn ses maandeoue baba in Bezuidenhoutvallei in Johannesburg ontvoer en sy babaoppasser byna vermoor het.
“Ifeanyi Jones, die kind se pa, het laat Woensdagaand ʼn SMS ontvang waarin die ontvoerders ‘n losprys van R100 000 eis,” het lt.kol. Lungelo Dlamini, ‘n polisiewoordvoerder, Donderdag gesê. “Daar word vermoed dat die egpaar, met hul drie kinders, steeds in Gauteng is. Die vrou is glo ook swanger,” het Dlamini bygevoeg.
Maroela Media het Woensdag berig die polisie is op soek na die egpaar wat ʼn kamer in die huis, waar die voorval plaasgevind het, gehuur het. “Die paartjie het nog nie hul huurgeld vir Desember 2012 betaal nie. Hulle het vermoedelik die babaoppasser probeer vermoor deur haar keel met ʼn skerp voorwerp af te sny en die baba te vat.”
Die polisie doen ʼn beroep op enigiemand met inligting om met hulle in verbinding te tree.
Jones het in The Star ‘n beroep op die egpaar gedoen om die baba ongedeerd aan hulle terug te besorg.