ʼn 85-jarige vrou is dood nadat haar huis aan die brand geraak het op ʼn kleinhoewe in North Riding in Johannesburg.
ʼn Woordvoerder van Netcare911, Jeffrey Wicks, sê brandbestryders het die brandende huis binnegegaan waar hulle die bewustelose vrou gevind het. Hulle het haar uit die huis gedra waarna paramedici haar behandel het vir erge rookinaseming. Die vrou se toestand het vinnig agteruitgegaan en sy is op die toneel dood. Die vrou se twee honde het ook in die brand omgekom. Die oorsaak van die brand is nog nie bekend nie en sal deur die polisie ondersoek word.