Die twee beskuldigdes in die Eugene Terre’Blanche-moorverhoor het glo gespog oor die moord op Terre’Blanche.
Twee getuies het Dinsdag in die rondgaande hof op Ventersdorp aangevoer dat beide die beskuldigdes erken het hulle het die moord gepleeg kort nadat dit op 3 April verlede jaar plaasgevind het. Albei die getuies is plaaswerkers op naburige plase. Enie Matshediso het getuig dat Chris Mahlangu en die minderjarige by haar huis opgedaag het en gesê het “ek is jou baas vandag…ek het Eugene Terre’Blanche doodgemaak”. Sy sê Mahlangu wou haar na die moordtoneel neem maar sy het geweier. Mahlangu het toe glo gevra om hulle foon te leen sodat hy die polisie kan skakel. Hulle het egter geweier en hom weggejaag. Nog ʼn plaaswerker, Richard Silane, het getuig dat Mahlangu en die minderjarige ook na sy huis gekom het en gesê het dat hulle Terre’Blanche doodgesteek het. Silane sê die minderjarige het die polisie van sy foon af geskakel.
Mahlangu en die minderjarige het albei onskuldig gepleit op aanklagte van moord, huisroof en poging tot diefstal met verswarende omstandighede.