Argieffoto
Vyf mense is Saterdag dood nadat die voertuig waarin hulle gery het, teen dié van ʼn beweerde dronkbestuurder gebots het.
Volgens inspekteur Kobeli Mokheseng, ʼn woordvoerder van die Ekurhuleni-metropolisie, het die voorval in Alrode plaasgevind. “Die beweerde dronkbestuurder (37) was in ʼn Volkswagen Golf onderweg na Alberton toe hy beheer oor sy voertuig verloor het. Sy voertuig het begin rol en in die weg van aankomende verkeer in beweeg,” het Mokheseng gesê.
“Terwyl die voertuig gerol het, het dit teen ʼn Toyota Corolla gebots en teen ʼn minibustaxi tot stilstand gekom. Altesaam vyf passasiers in die taxi, waaronder ʼn 5-jarige kind, is in die botsing dood.”
Die bestuurder van die Toyota het geringe beserings opgedoen. Die res van die taxi se passasiers is in ʼn ernstige toestand na die hospitaal geneem. Die beweerde dronkbestuurder het geringe beserings opgedoen. Die man is op die toneel in hegtenis geneem en moet Maandag in die Palm Ridge-landdroshof verskyn.
