‘Blinde’ beroof jong vrou

Argieffoto

ʼn 25-jarige vrou van Johannesburg is glo Maandag deur ʼn vrou beroof wat haarself as ʼn blinde persoon voorgedoen het.

“Die ‘blinde’ vrou het twee medepligtiges gehad,” het adjudant-offisier Xoli Mbele, woordvoerder van die polisie, Dinsdag gesê. “Een van die medepligtiges het die slagoffer genader en gevra of die vrou sy ‘blinde’ vriendin oor ʼn besige straat in die middestad kan help.”

ʼn Derde persoon het die vrou toe glo genader en gewaarsku dat die ‘blinde’ vrou en haar vriend grypdiewe is en dat sy moet seker maak of sy nog al haar besittings het. “Sy het haar beursie oopgemaak waarna die persoon, wat haar kamstig kom help het, dit glo gegryp en weggehardloop het. Die ‘blinde’ vrou en die ander verdagte het daarna die slagoffer se trouring van haar vinger af gegryp en ook weggehardloop.”

Die polisie het later al drie verdagtes in hegtenis geneem terwyl hulle by ʼn plaaslike kroeg gekuier het. Hulle moet binnekort in die hof verskyn.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Marlene ·

en dit is dan een van die redes waarom ek nie help of geld gee vir die talle “blindes” wat bedel.

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.