ʼn Man in sy veertigs is Saterdag in Bloemfontein dood ná ʼn fratsongeluk terwyl hy ʼn bakkie gewas het.
Derrick Banks, ʼn woordvoerder van ER24, sê die ongeluk het omstreeks 08:00 in Petagonpark plaasgevind. “Na wat verneem word, was die man besig om ʼn vriend se bakkie te was, toe die voertuig skielik agteruit begin beweeg het. Die bakkie het die man teen ‘n muur vasgepen,” het Banks gesê.
Die man is op die grond aangetref toe paramedici op die toneel gekom het. Die bakkie is intussen vorentoe getrek in ʼn poging om die man se lewe te red. “Die man was ongelukkig reeds dood. Hy is vermoedelik weens borsbeserings oorlede,” het Banks gesê.
Die polisie is na die toneel ontbied en die saak word verder ondersoek.