Bok Radio onttrek van Ghoemas

Steve Hofmeyr (Foto: Janie Monsieur/Maroela Media)

Bok Radio het Dinsdagaand aangekondig dat hy sy betrokkenheid by vanjaar se kykNET Ghoema-musiektoekennings onttrek.

Dít volg nadat die musiekvideo van “Die Land” van die benoemingslys van die Ghoema-musiektoekennings verwyder is op versoek van MultiChoice as gevolg van Steve Hofmeyr se betrokkenheid daarby. Dié lied word deur Hofmeyr, Bok van Blerk, Bobby van Jaarsveld, Jay en Ruhan du Toit gesing.

Maroela Media het vroeër berig MultiChoice het gedreig om sy borgskap van dié geleentheid te beëindig indien dit nie gebeur nie.

Heidi Edeling, hoof‑ uitvoerende beampte van die Ghoemas, het gesê daar is by wyse van ʼn demokratiese stemproses besluit dat “Die Land” se musiekvideo van die benoemings onttrek word.

“As gevolg van Steve Hofmeyr se deelname aan die video, versoek MultiChoice dat die benoeming van ‘Die Land’ onttrek word. Verder verklaar hulle dat indien dit nie plaasvind nie, hulle geen ander opsie het as om hul borgskap van die Ghoema-musiektoekeninngs 2019 te onttrek nie,” het Edeling verduidelik.

Bok Radio het in ’n verklaring gesê dat hy met skok van dié besluit van die organiseerders van die Ghoema-musiektoekennings, die Ghoema Musiek Trust, verneem het.

“Bok Radio kan geen vorm van diskriminasie op enige vlak teenoor enige kunstenaar(s), groep of taal ondersteun nie. Ons ondersteun die kunste en kunstenaars se reg op assosiasie, digterlike vryheid en vryheid van spraak.

“Gesien in die lig [hiervan] het ons geen ander keuse as om ons deelname aan die 2019 kykNET Ghoema-musiektoekenningsgeleentheid op te skort nie,” lui die verklaring.

Dié radiostasie sou die kategorie Gewildste liedjie van die jaar by vanjaar se geleentheid borg. “Ons is van mening dat die ‘Die Land’ ʼn kandidaat sou wees om dit te wen. In die belang van deursigtigheid en regverdigheid het ons besluit om ons assosiasie met die kategorie te onttrek.”

Volgens die verklaring sal geen verteenwoordiger van Bok Radio ook die geleentheid bywoon nie.

Arnold Coleske van Coleske Artists het die Ghoema Musiek Trust se besluit as “ʼn klap in die gesig van kunste, vryheid van uitdrukking én vir die bevordering van Afrikaans” bestempel.

Edeling het alle verdere navrae na kykNET verwys. ʼn Woordvoerder van kykNET het egter navrae na Joe Heshu van MultiChoice verwys.

Maroela Media het navrae aan Heshu gerig en wag op terugvoer.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

175 Kommentare

jongste oudste gewildste
Schalk

Bokradio….! We salute you! Julle is ysters. STEVE VIR ONS, ONS VIR STEVE!

PW Kruger

Dan gaan ek nou maar my DSTV afsit.
Hoe gaan ek nou my sport kan kyk? Raad asb?

Theari

Dat een enkele man soveel groot name se broeke laat bewe. Hulle optrede is belaglik en hulle rede dat Steve deel is van die lied nog meer belaglik.

Spikkels

Dankie BokRadio dat jul n standpunt inneem teen sulke blatante diskriminasie van ons sangers maak nie saak wat wie of hoe. Ghoema en die persone wat polities korrek te wil wees. SKAAM JULLE. RUGGRAATLOOS. Demokratiese stemme ??? ek wonder. Wel dit is nou ons demokratiese reg om jul nie te ondersteun nie asook Multichoice en kie. Het my Muti Choice DSTV gekanselleer.

Andreas

Waar is die res met yster in hul bloed vir wat reg is? Komaan ouens, die aand is nog jonk en heeldag more lê voor!