ʼn Man (in sy 40’s) is dood ná ʼn boom Donderdag by Lenasia in Johannesburg op hom geval het, het paramedici gesê.
Nog ʼn persoon het ligte beserings opgedoen nadat hy deur ʼn paar takke getref is, het Vanessa Jackson, woordvoerder vir ER24 gesê. Dié man is na die Lenmed Privaathospitaal afgevoer. Die mans was glo besig met werk langs die spoorwegkruising in Lenasia. Die boom is glo deur ʼn stormwind ontwortel en het toe op die man geval. ʼn Hewige reënbui het daarna losgebars oor die gebied.
