Verbruikers kan verwag om van 3 April af meer te betaal vir brandstof.
Die pryse van petrol en diesel sal op 3 April met ongeveer 7c tot 12c per liter styg, afhangende van die graad van die brandstof en die geografiese ligging van die vulstasie waar dit gekoop word.
“Die onverwagse styging is hoofsaaklik aan ʼn onvoorspelbare styging van 10,96c per liter in die sogenaamde leiheffing (slate levy) te wyte,” het Paul Joubert, senior navorser by Solidariteit se Navorsingsinstituut, gesê. “Die feit dat die styging twee dae vroeër as gewoonlik aangekondig is, het ook ʼn klein invloed gehad, aangesien die berekeningstydperk vir die prys slegs 18 dae was en nie 20 soos aanvanklik verwag nie. Daar sal wel met die prysverandering in Mei hiervoor opgemaak word.”
Die prys van 95-oktaan petrol sal in Gauteng met 12c per liter styg, terwyl dit aan die kus met 10c sal styg.
Die prys van 93-oktaan petrol in Gauteng sal 10c per liter hoër wees.
Die groothandelprys van ʼn liter diesel met ʼn 0,05% swawelinhoud sal in Gauteng 9,06c hoër wees, terwyl dit 7,16c hoër sal wees aan die kus.
Die groothandelprys van ʼn liter diesel met ʼn 0,005% swawelinhoud sal in Gauteng 10,06c hoër wees, terwyl dit 8,16c hoër sal wees aan die kus.
“Die prysstygings kan ook verder van distrik tot distrik verskil, aangesien die vervoerdifferensiale tussen distrikte ook aangepas is.” het Joubert bygevoeg.
en ons beraal vir zuma en sy trawante se petrol, so wat sal hulle worrie oor di man op straat wat by die werk mut kom.