ʼn Britse man is dood tydens ʼn geveg wat na Saterdag se Super15-wedstryd buite die Absa-stadion in Durban uitgebreek het.
“ʼn Argument het tussen ʼn groep mense ontstaan. Ons weet nie wat tot die geveg aanleiding gegee het nie,” het lt. kol Vincent Mdunge, woordvoerder van die polisie, gesê. Mdunge sê die 28-jarige Britse man is geskop en geslaan en het aan sy beserings beswyk. Die geveg het na die Super15-wedstryd tussen die Sharks en die Rebels uitgebreek. Mdunge sê die polisie is besig om verklarings van ooggetuies te kry en niemand is nog in hegtenis geneem in verband met die voorval nie. Brian van Zyl, uitvoerende hoof van die Sharks, sê mediese personeel by die stadion het probeer om die geveg te keer. “Ons het ons eie interne ondersoek na die voorval van stapel gestuur en is tevrede dat ons gekontrakteerde diensverskaffers, Fidelity Security en ER24, alles moontlik gedoen het om die geveg te stop.”