Twee broers het Sondagoggend in Rooskraaldam naby die Vaalrivier in Noordwes verdrink terwyl hulle saam hulle gesin visgevang het.
ʼn Polisiewoordvoerder, ao. Sam Tselanyane, sê die twee broers, onderskeidelik 11 en 12 jaar oud, het Sondagoggend saam met hulle ouers en ander familielede gaan visvang. Hy sê die twee seuns het omtrent 8:30 in die water begin swem. “Die seuns wou glo hulle visvangnette in die water gooi en het dieper die dam ingegaan met ʼn bootjie wat hulle op die dam gevind het. Die bootjie het omgeslaan en hulle het verdrink.” Tselanyane sê die pa se kollega het in die water gespring en die seuns probeer red. Hy kon egter nie betyds by hulle uitkom nie en hulle het verdrink. Polisieduikers het die seuns se liggame kort na 17:00 uit die dam gehaal. Die polisie ondersoek die saak.
