‘Bryce Lawrence’ se foon lui sonder ophou

ʼn Inwoner van Auckland in Nieu-Seeland, wat dieselfde naam het as die skeidsregter, Bryce Lawrence, se huistelefoon lui sonder ophou.

Talle Suid-Afrikaanse rugbygeesdriftiges wat steeds vir Lawrence die skuld gee vir Suid-Afrika se nederlaag teen Australië in die kwarteindronde van die wêreldbeker, skakel die verkeerde Lawrence op sy huistelefoon om hulle misnoeë te kenne te gee. Volgens die Nieu-Seeland Herald het dit so erg geraak dat Lawrence sy diensverskaffer gevra het om sy nommer te verwyder van ʼn webtuiste waar dit verskyn het. Intussen het ʼn petisie op die sosiale netwerk Facebook, wat vra dat Lawrence nooit weer ʼn rugbywedstryd hanteer nie, reeds deur duisende mense ondersteun. Meer as 74 duisend mense het teen Vrydagoggend die “Petition to stop Bryce Lawrence ever reffing a rugby game again”-blad ondersteun.