Argieffoto
Die Nasionale Seereddingsinstituut (NSRI) doen ʼn beroep op die publiek om nie Chinese lanterns aan die kuslyn vry te laat nie, aangesien dit gereeld vir rooi noodfakkels aangesien word.
“Die NSRI het Saterdag omstreeks 20:30 reageer op berigte dat ʼn rooi noodfakkel tussen Shelly Beach en Port Shepstone aan die KwaZulu-Natalse kus gesien kan word,” het Craig Lambinon, woordvoerder van die NSRI, gesê.
NSRI-bemanning het tydens ʼn voorlopige ondersoek om uit te vind waar die bote hulself ter see mag bevind, bepaal dat die rooi noodfakkel eintlik ʼn Chinese lantern is.
“Tydens ʼn onlangse voorval in Engeland het ʼn Chinese lantern bo-op ʼn plastiekfabriek beland en ʼn brand het by die fabriek uitgebreek,” het Lambinon bygevoeg. “Dit is ʼn bykomende gevaar wat Chinese lanterns kan inhou.”
