Die ontbinde liggaam van ʼn man is Woensdag in die veld langs die Bynespoort-grondpad in Cullinan, buite Pretoria, opgespoor.
Johannes Jaftha, woordvoerder van die polisie, sê twee mense was omstreeks 08:30 besig om hout bymekaar te maak toe hulle op die liggaam afgekom het. “Die paartjie het ʼn verbyganger gestop en versoek om die polisie in kennis te stel. Die oorsaak van die dood is onbekend en ʼn nadoodse ondersoek sal binnekort uitgevoer word,” het hy gesê.
Jaftha sê die man, in sy 30s, se identiteit is nog nie bekend nie. Hy het glo ʼn khakibroek, ʼn roomkleurige T-hemp en swart sandale aangehad.
Die polisie se ondersoek duur voort. -SAPA