DA-ondersteuners het Maandag ‘n betoging in Pietermaritzburg gehou om aan te dring op die onmiddellike instelling van ʼn jeugloonsubsidie.
Lindiwe Mazibuko, parlementêre leier van die DA, en Sizwe Mchunu, die party se provinsiale leier, het die optog van Dales Park na premier Zweli Mkhize se kantore gelei.
Die DA het in ʼn verklaring gesê die party neem kennis van Mkhize se ondersteuning van ʼn jeugloonsubsidie.
William Goldstone, woordvoerder vir die party, het gesê die implementering van die subsidie sal meer as 200 000 poste vir die jeug beteken. Hy het gesê die regering is huiwerig om dit in te stel weens druk deur Cosatu.
Daar was ʼn sterk polisieteenwoordigheid na ʼn soortgelyke optog verlede maand toe die DA na die betrokke vakbond se hoofkwartiere in die Johannesburgse middestad opgeruk het oor Cosatu se teenkanting teen die subsidie. Dié optog het handuit geruk toe Cosatu-lede die DA teengestaan het en na bewering met klippe gegooi het.