Dewani beleef glo terugslag

Shrien Dewani, wat daarvan verdink word dat hy in 2010 sy vrou Anni tydens hul wittebrood in Suid-Afrika laat vermoor het, se gesondheid het glo ʼn terugslag beleef.

Dewani (33) word in ʼn hospitaal in Bristol behandel vir depressie en post-traumatiese stresversteuring. Dit kom nadat die Westminster-landdroshof verlede maand gehoor het dat Dewani se gesondheid “noemenswaardig” verbeter het. Dit het ook gister aan die lig gekom dat voorstelle ingedien is dat Dewani vrywillig na Suid-Afrika terugkeer om hier verhoor te word op aanklag van die moord op sy vrou. Dewani se uitleweringsverhoor sal op 1 Julie begin.
Anni is in November 2010 in Kaapstad doodgeskiet nadat sy en haar man glo tydens hulle wittebrood gekaap is.