Motordiewe het ontangs ‘n lykswa van ‘n begrafnisonderneming in Pretoria gesteel.
Volgens Kobus Minnaar, eienaar van Martin’s-begrafnisonderneming in Centurion, het die donker metaalgrys Ssang Yong Stavic slegs sowat 60 000km gery, het Beeld Maandag berig.
Minnaar se buurtwag het hom verlede Sondag net ná middernag gebel om te sê die motorhuisdeure van sy onderneming staan oop. Die diewe het glo by die ontvangsarea ingebreek om die voertuig se sleutels te kry. Volgens Minnaar het hulle toe in trurat deur die staaldeure gery, só erg dat die hekke van die skarniere afgeruk is. “Wat wil hulle met ’n lykswa maak? Dit het nie eens sitplekke agterin nie. Ons het stukke van die voertuig etlike kilometers ver op die snelweg opgetel. Dit voertuig moet ‘n wrak wees,” het hy gesê.
Hy het intussen ‘n nuwe voertuig aangeskaf wat by ‘n ander perseel parkeer word.
– Sapa