Die regering het gesê hy probeer meer besonderhede bekom rondom die aanhouding van die Suid-Afrikaanse kameraman Adil Bradlow in Egipte, berig EWN.
Bradlow het vroeër die week gebeure in Kaïro vir Al Jazeera gedek toe hy en drie van sy kollegas in hegtenis geneem is vir redes wat nog nie bekend gemaak is nie.
Clayson Monyela, woordvoerder van die departement van internasionale betrekkinge, het aan EWN gesê hulle het ‘n diplomatieke sending na Egipte gestuur om met Adil Bradlow te vergader. “Die ambassadeur in Houghton het met die owerhede in Egipte in verbinding getree,” het Monyela gesê. “Die departement sal konsulêre bystand aan hom en sy familie verleen.”
Bradlow se vriend, Shafik Kassim, sê dit is moontlik dat Adil eksklusiewe materiaal wou bekom. Adil se naasbestaandes sê glo hy weet hoe om homself in sulke situasies te hanteer.