‘n Man wat glo ‘n 13-jarige dogter verkrag het, is in Butterworth in die Oos-Kaap in hegtenis geneem.
“Die tiener was op pad na ‘n winkelsentrum naby Ndabakazi-stasie toe sy die 59-jarige man Donderdagmiddag raakgeloop het,” het kapt. Jackson Manatha, woordvoerder van die polisie in die Oos-Kaap, gesê. “Die man het die tiener glo ‘n R2-muntstuk aangebied, en toe sy weier om dit te vat, het hy haar aangeval, in ‘n veld in getrek en haar toe verkrag. Hy het die tiener gedreig en aangesê dat sy vir niemand van die voorval mag vertel nie.”
Manatha sê dit is nie duidelik hoe lede van die gemeenskap van die voorval te hore gekom het nie, maar hulle het die man Dinsdag by sy huis gaan konfronteer. “Hulle het die polisie ontbied, wat die man toe dadelik in hegtenis geneem het,” het hy gesê.
Die man sal Donderdag in die landdroshof in Butterworth verskyn.