‘n Non en ‘n ander kerkganger is Sondag in ‘n kerk op die Russiese eiland, Sachalin doodgeskiet, en nog ses mense gewond. Die skieter word aangehou.
Sachalin is ‘n groot ylbevolkte eiland ten noorde van Japan, waarop Japan aanspraak maak.
Hoewel die skieter se identiteit deur die polisie bepaal is, is dit nog nie bekend wat die man se motief was nie.
‘n Skolier het vroeër die maand op die buitewyke van Moskou ‘n onderwyser en ‘n veiligheidswag by ‘n skool doodgeskiet.
Veiligheidsmaatreëls in Rusland is op die oomblik baie verskerp nadat ekstremistiese Moslems gedreig het om terreuraanvalle uit te voer weens die Olimpiese Winterspele wat in Rusland plaasvind. Meer as 30 mense is onlangs in twee selfmoordbomaanvalle in Wolgograd dood.
Bron: Trouw