Skikkingsamesprekings het ʼn dooiepunt bereik in die siviele saak van ʼn drawwer wat in hegtenis geneem is nadat hy glo pres. Jacob Zuma se motorkade met ʼn handgebaar beledig het, het die Cape Times Dinsdag berig.
Chumani Maxwele dagvaar glo die polisiedepartement vir R1.45 miljoen nadat hy glo in een van die voertuie van die konvooi gedruk is terwyl hy in Februarie 2010 in De Waal-rylaan gedraf het. Volgens die berig is hy in hegtenis geneem, vir 24 uur lank aangehou en later vrygelaat sonder dat hy in die hof verskyn of aangekla is.
Maxwele ontken dat hy ooit die onwelvoeglike handgebaar gewys het, en voer aan hy het sy hand gewaai omdat die sirenes oorverdowend was.
Die koerant berig die saak sou Maandag aangehoor word, maar omdat die partye glo die saak wou skik het die saak nie in die hof voorgekom nie. ʼn Ooreenkoms kon egter nie bereik word nie.
Dit is nie duidelik of die saak nou hof toe sal gaan nie.