Drie jong mans is Saterdagoggend dood nadat hulle motor naby die Grasmere-tolhek op die N1 omgeslaan en gerol het.
ER24 sê in ʼn verklaring dat die bestuurder glo beheer verloor het waarna die motor die pad verlaat het en verskeie kere gerol het. Drie van die vier insittendes is uit die motor geslinger en het sowat 100m van die wrak gelê. Die drie mans het ernstige kopbeserings opgedoen en is op die toneel dood verklaar. Die vierde insittende is in die wrak gevind. Hy het ligte beserings opgedoen. Hy is op die toneel behandel waarna hy na die Chris Hani Baragwanath-hospitaal vervoer is vir verdere behandeling. Die polisie ondersoek die oorsaak van die ongeluk.