Drie kinders is in kruisvuur gewond na bendegeweld Woensdagaand in Kaapstad uitgebreek het.
Kaptein Frederick van Wyk, ʼn polisiewoordvoerder, het gesê die voorval het in Manenberg plaasgevind.
“’n 3-jarige seun is in sy regterhand geskiet en twee 12-jarige meisies is in hul bene geskiet. Hulle was besig om buite hul huis in Lansman Walk te speel,” het hy gesê. Al drie kinders is in die hospitaal opgeneem.
Na wat verneem word, het die bendes, The Americans en Hard Livings, op mekaar losgetrek na ʼn vredesooreenkoms verbreek is.
