Drie mans is in hegtenis geneem in verband met die moord op ʼn 8-jarige seun en ʼn aanval op ʼn vrou in Kaapstad.
Kapt. Frederik van Wyk, ʼn polisiewoordvoerder, sê die eerste verdagte is Saterdag in hegtenis geneem. Hy sê nog twee verdagtes is Donderdag in hegtenis geneem na verdere ondersoeke. Die seun, Junaid McKenzie, is die aand van 27 Junie in Steenberg doodgeskiet. “Hy het buite gespeel en naby hom was mense wat dominoes onder ʼn lamppaal gespeel het. Skote is geskiet en hy is raakgeskiet. ʼn 32-jarige vrou is in die rug geskiet.” McKenzie het in die hospitaal aan sy beserings beswyk. Die drie verdagtes sal binnekort in die Wynberg-landdroshof verskyn op aanklagte van moord en poging tot moord.