Drie mans van Zimbabwe is Donderdag in hegtenis geneem in verband met die moord op Corrie Sanders. Sanders, ‘n voormalige swaargewigbokskampioen, is die naweek tydens ʼn rooftog by ʼn restaurant doodgeskiet.
Die 46-jarige bokser was Saterdagaand by die Thatch Haven Country Lodge in Brits om sy broerskind, Michael Sanders, se 21ste verjaardagpartytjie te vier, toe rowers opgedaag en lukraak begin skiet het. Die rowers het klante by die restaurant van hul persoonlike besittings beroof. Sanders is tydens die voorval in die maag en hand geskiet en het Sondagoggend in die Kalafong-hospitaal aan sy beserings beswyk.
Brigadier Thulani Ngubane, ʼn polisiewoordvoerder, het gesê die verdagtes is in ʼn informele nedersetting naby Brits vasgetrek. “Van die besittings wat tydens die voorval gesteel is, is in hul besit gekry. Dit verbind hulle met die voorval,” het Ngubane gesê.
Die verdagtes moet Maandag in die Brits-landdroshof verskyn. Sanders se begrafnis sal Maandag vanuit die NG Kerk Wonderpark in Akasia, Pretoria-Noord plaasvind.