Wolwe by die Colchester-dieretuin in Engeland
Een wolf het Dinsdag paniek gesaai in die suide van Engeland toe ʼn groep van vyf wolwe uit ʼn dieretuin ontsnap het.
Die groep wolwe het Dinsdagoggend vroeg deur ʼn beskadigde heining uit hul kamp by Colchester-dieretuin na die ooste van Engeland ontsnap.
Twee is net ná die ontsnapping doodgeskiet. Een van die wolwe het teruggekeer en een is met ʼn verdowingsmiddel geskiet en aangekeer.
Een van die wolwe het egter ure lank op vrye voet gebly. Mense in die omgewing is gewaarsku om klein kindertjies by die huis te hou en die polisie het die gebied met ʼn helikopter gefynkam.
Die dier is Dinsdagmiddag omstreeks 16:00 opgespoor en van kant gemaak.
Bewaarders by die dieretuin was glo “platgeslaan” deur die verlies aan die wolwe. Die dieretuin het in ʼn verklaring gesê dat dit sowat 15 minute duur voordat ʼn verdowingspyl inskop “en werk soms nie op ʼn dier wat onder druk verkeer nie”. Drie van die wolwe moes gevolglik geskiet word.
Die dieretuin sê dit is nog nie duidelik hoe die heining beskadig is nie. Die heining word glo daagliks nagegaan.
