[Foto’s] Droogtehulp: Groot hartseer ná brand

Die vragmotors is vernietig. Foto: Twitter via ER24

Die vragmotors is vernietig. Foto: Twitter via ER24

Twee vragmotors van die Boere in Nood-groep wat op pad was om voerbale na Bloemfontein te vervoer, het Woensdag uitgebrand op die R30 tussen Theunissen en Brandfort.

Volgens Nico Gerber, een van die direkteure van die Boere in Nood-groep, word daar in dié stadium slegs bespiegel oor wat presies die brand veroorsaak het. “Die polisie vermoed dis ʼn sigaretstompie van ʼn verbygaande motor. Ander sê dis die uitlaatpyp wat ʼn vonk veroorsaak het. Volgens die ER24-verklaring het weerlig die bale getref. Ons kan egter nog nie definitief sê nie.”

Daar word vermoed dat kole en brandende gras van die een vragmotor na die tweede een oorgewaai het, wat veroorsaak het dat die bale van die tweede vragmotor ook aan die brand geslaan het. Gerber het gesê die betrokke mense, onder wie lede van die Facebook-gemeenskap, is in rou gedompel, veral omdat hulle bystand aan boere wou lewer. Niemand is egter in die voorval beseer nie. “Boere in Nood het self die bale gekoop. Die vragmotors is geskenk deur die Van Staden-steenmaatskappy om die bale na Bloemfontein te vervoer. Ons weet nie eintlik wat om hiervan te dink nie.”

Drie ander vragmotors het egter steeds gister 120 bale voer in Bloemfontein gaan aflaai, ten spyte van die voorval. “Ons wil steeds die boere help, dit gaan net so sleg met hulle,” het Gerber gesê.

Die een vragmotor het heeltemal uitgebrand, terwyl die perd van die ander een gered kon word.

Intussen het duisende boodskappe van die groep, wat reeds bystand gelewer het met duisende liters water en voer in droogtegeteisterde gebiede, ingestroom. “Ons wil graag die bybetaling vir die versekering aan hulle skenk. Dit is die minste wat ons kan doen ná hulle net iets goeds wou doen en nou twee vragmotors minder het,” het Gerber gesê.

Raak só betrokke:

Rekeninghouer: Boere in Nood
FNB Rekeningnommer: 62522986043
Taknommer: 250655
Verwysing: “Brandtrok”
Besoek die Boere in Nood Facebook-groep.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

35 Kommentare

jongste oudste gewildste
Mr P

Kan iemand nie hie ook help nie. In nou al geruime tyd werkloos en is besig om als te verloor. Ons moet maar probeer deurdruk.

Louis

1 Stompie ….. 1 Vonk ….. 1 Weerligstraal ……………. 2 Trokke ?????????
Ek verstaan nie mooi nie !!

Des

Ja nee. So vêr uitmekaar??? Verstaan ook nie daai een nie.

Rose

Het jy al op a plaas gewoon. Ek het gesien hoe brand binne sekondes oor a dubbel pad spring veral as daar wind is. En onhou sulke groot trokke maak baie wind van hul eie. So dit is vir my maak dit sin. Ek voel baie jammer vir daai boere dit is baie hartseer om te sien hoe gaan als op in vlamme.

Ronelle

Dit is so hartseer!