ʼn Man is dood en 16 mense is beseer nadat ʼn taxi Maandagoggend op die M25-pad naby Besters, in KwaZulu-Natal, omgeslaan het.
“Die taxi was onderweg na Durban toe die bestuurder beheer oor die voertuig verloor het en dit verskeie kere gerol het,” het Chris Botha, ʼn woordvoerder van Netcare 911, gesê.
ʼn Bejaarde man is tydens die ongeluk uit die voertuig geslinger en is op die toneel dood verklaar.
“Agt passasiers het ernstige beserings opgedoen en agt het net geringe beserings opgedoen,” het Botha gesê. Die beseerdes is op die toneel gestabiliseer en vir verdere behandeling na verskeie hospitale in die omgewing geneem.